Talyp ýoldaşymyz — ýeňiji!
2022-nji ýylyň 9-njy sentýabrynda Türkmenistanyň Jemgyýetçilik guramalar merkezinde Türkmenistanyň Magtymguly adyndaky Ýaşlar guramasynyň Merkezi Geňeşiniň «Adalat» gazetiniň redaksiýasy bilen bilelikde şanly Garaşsyzlygymyzyň 31 ýyllyk toýy mynasybetli «Jan Watanym Türkmenistan» atly yglan eden bäsleşiginiň jemi jemlendi. Bu bäsleşikde Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň Syýasy kommunikasiýa we internet žurnalistikasy hünäriniň II ýyl talyby Atamyrat Bekçiýew ýeňiji boldy. Biz hem öz gezegimizde talyp ýoldaşymyzy ýeňiji bolmagy bilen gutlap, geljekde hem oňa döredijilik äleminde uly üstünlikleriň ýaran bolmagyny arzuw edýäris. Sözümiziň şu ýerinde bäsleşikde ýeňiji bolan talyp ýoldaşymyzyň ýürek buýsanjyny okyjylar bilen paýlaşýarys:
Berkarar döwletiň täze eýýamynyň Galkynyşy döwründe eziz Diýarymyz hormatly Prezidentimiziň parasatly baştutanlygynda bedew bady bilen ynamly öňe barýar. Bagtdan paýly biz — ýaşlara hemme taraplaýyn ösen kämil şahsyýetler bolup ýetişmekde, Watanymyzyň ösüşine özümiziň mynasyp goşandymyzy goşup, yhlasly zähmet çekmekde, jemgyýetçilik durmuşyna işjeň gatnaşmakda uly mümkinçilikler döredilýär.
Hormatly Prezidentimiz şu ýylyň 1-nji sentýabrynda geçirilen Türkmenistanyň Magtymguly adyndaky Ýaşlar guramasynyň VII gurultaýynda eden çykyşynda:«Bagtyýar ýaşlarymyz halk hojalygynyň dürli pudaklarynda milli hem-de döwlet maksatnamalaryny durmuşa geçirmekde yhlasly zähmet çekýärler» diýip, ýaşlaryň jemgyýetdäki ornuna belent baha berdi. Ýurdumyzda zehinli ýaşlary ýüze çykarmak maksady bilen, Türkmenistanyň Magtymguly adyndaky Ýaşlar guramasynyň Merkezi Geňeşiniň «Adalat» gazetiniň redaksiýasy bilen bilelikde «Jan Watanym Türkmenistan» atly yglan eden bäsleşiginde maňa hem ýeňiji bolmak bagty miýesser etdi. Biz — ýaşlara döredilýän uly mümkinçilikler üçin Gahryman Arkadagymyza, Arkadagly Serdarymyza köp sagbolsun aýdýaryn. Goý, Gahryman Arkadagymyzyň, Arkadagly Serdarymyzyň janlary sag, belent başlary aman bolsun, tutýan tutumly işleri rowaçlyklara beslensin!
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy hünäriniň talyby.