“Talyp gözeli - 2022” bäsleşiginiň jemleýji tapgyry
2022-nji ýylyň 3-nji martynda Türkmenistanyň Jemgyýetçilik guramalary merkezinde Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Bilim ministrliginiň hem-de Türkmenistanyň Zenanlar birleşiginiň Merkezi Geňeşiniň bilelikde guramagynda Berkarar döwletiň täze eýýamynyň Galkynyşy döwrüniň talyp gyzlarynyň iş başarjaňlygyny, ugurtapyjylygyny, ruhubelentligini, keşp hem-de edep gözelligini, halkymyzyň milli däp-dessurlaryny, ruhy-ahlak gymmatlyklaryny, medeniýetini, edep-ekramlylygyny açyp görkezmek maksady bilen, Halkara zenanlar güni mynasybetli her ýylda ýurdumyzyň ýokary okuw mekdepleriniň talyp gyzlarynyň arasynda yzygiderli geçirilýän “Talyp gözeli - 2022” atly gözellik bäsleşiginiň jemleýji tapgyry geçirildi. Bäsleşigiñ jemleýji tapgyryna gatnaşan talyp gyzlar onuñ şertine görä, ýurdumyzyň batly gadamlaryny wasp etmek, Watanymyzyň gazanýan üstünliklerini dürli dillerde aýdyp bermek, “Hünärim bar - hormatym bar” şygar astynda keşde çekmek ukyplaryny açyp görkezmek we mähriban Arkadagymyzyň “Bereketli türkmen saçagy” atly kitabyndan ugur alyp, türkmen milli tagamy bolan unaş kesmek şertleri boýunça bäsleşdiler.
Ýurdumyzyň medeniýet, sungat we döredijilik işgärlerinden hem-de bäsleşigi yglan eden taraplaryň wekillerinden ybarat bolan eminler topary bäsleşige gatnaşyjylaryň çykyşlaryna mynasyp baha berdiler. Bu gözellik bäsleşigine Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň I ýyl talyby Oraztäç Çapaýewa gatnaşyp, üstünlikli çykyş etdi. Bäsleşigiň netijeleri boýunça aýratyn tapawutlananlara hem-de ýeňijilere Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Bilim ministrliginiň, Türkmenistanyň Zenanlar birleşiginiň Merkezi Geňeşiniň Diplomlary, Hormat we Minnetdarlyk hatlary hem-de gymmatbahaly sowgatlar gowşuryldy.
Şamyrat BEGENJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
1-nji ýyl talyby.