Talyp deň-duşumyzyň üstünligi
2024-nji ýylyň 19-njy oktýabrynda Magtymguly adyndaky Türkmen döwlet uniwersitetinde Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alymlarynyň, gazet-žurnallaryň redaktorlarynyň, bu ýokary okuw mekdebiniň professor-mugallymlarynyň, talyplarynyň gatnaşmagynda türkmeniň nusgawy şahyry Annagylyç Mätäjiniň doglan gününiň 200 ýyllygy mynasybetli «Ýaşlary milli ruhda terbiýelemekde Annagylyç Mätäjiniň edebi döredijiliginiň ähmiýeti» atly ylmy-döredijilik maslahaty geçirildi. Ylmy-döredijilik maslahatyň dowamynda Gündogaryň beýik akyldary Magtymguly Pyragynyň doglan gününiň 300 ýyllygy mynasybetli Türkmenistanyň Bilim ministrligi we Magtymguly adyndaky Türkmen döwlet uniwersiteti tarapyndan ýurdumyzyň ýokary we orta hünär okuw mekdepleriniň talyplarynyň arasynda türkmen, iňlis, rus dillerinde geçirilen «Magtymguly sözle bu şirin dilde» atly diktant bäsleşiginde, şeýle-de «Ak ýollarda peder ýoly görelde, asudalyk gadym ile ýörelge» ady bilen geçirilen surat çekmek bäsleşiginde ýeňiji bolan talyp ýaşlary sylaglamak dabarasy geçirildi. Ylmy-döredijilik maslahatyna gatnaşyjylar halkymyzyň beýik şahsyýetleriniň şanyny dünýä ýaýmak ugrunda alyp barýan işleri üçin türkmen halkynyň Milli Lideri Gahryman Arkadagymyza we hormatly Prezidentimiz Arkadagly Gahryman Serdarymyza alkyş we hoşallyk sözlerini beýan etdiler.
Buýsanç bilen belläp geçsek, talyplaryň arasynda türkmen, iňlis, rus dillerinde geçirilen «Magtymguly sözle bu şirin dilde» atly diktant bäsleşiginde Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň II ýyl talyby Orazjemal Çaryýarowa III orna mynasyp boldy. Biz hem öz gezegimizde, talyp deň-duşumyzy gazanan üstünligi bilen tüýs ýürek gutlaýarys!
Tumar JOLLYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
III ýyl talyby.