TALYBYMYZYÑ SPORT ÄLEMINDÄKI NOBATDAKY ÝEÑIŞI
Sport sagdynlygyň gözbaşy, jemgyýetiň sagdynlygyny üpjün edýän gymmatlykdyr. Her bir ynsanyň sagdyn pikirlenmegi, zähmet öndürijiliginiň netijeli bolmagy üçin akyl zähmeti bilen fiziki zähmetiň gezekleşdirilmegi zerur bolup durýar.
Berkarar döwletiň täze eýýamynyň Galkynyşy döwründe, “Pähim-paýhas ummany Magtymguly Pyragy” ýylynda hem ýaş nesliň bedenterbiýe we sport bilen meşgullanyp, berk bedenli, kämil aň-düşünjeli bolup ýetişmekleri üçin giň mümkinçikler döredilýär. Şeýle mümkinçiliklerden peýdalanýan türkmen ýaşlary hem sportuň dürli ugurlary boýunça döwlet derejesinde hem-de halkara derejesinde geçirilýän bäsleşiklere gatnaşyp ýokary netijeler gazanýarlar.
2024-nji ýylyň 24-nji oktýabrynda Karatedo boýunça Türkmenistanyň çempionatynda Kata ugry boýunça 18-29 ýaşly oglanlaryň arasynda geçirilen ýaryşda Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 2-nji ýyl talyby Rasul Atajanow I orna mynasyp boldy. Talyp deň-duşymyzyň gazanan ynamly ýeňşi bilen gutlap, sport äleminde uly üstünlikleriň ýar bolmagyny tüýs ýürekden arzuw edýäris.
Biz ýaşlara okamaga, öwrenmäge, döretmäge, bedenterbiýe we sport bilen meşgullanmaga döredip berýän giň mümkinçilikleri üçin türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza köp sagbolsun aýdýarys. Goý, Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun.
Döwletmyrat ARAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.