Talybymyz — döredijilik bäsleşiginiň ýeňijisi
2022-nji ýylyň 15-nji sentýabrynda «Garagum» žurnalynyň hem-de Türkmenistanyň Kärdeşler Arkalaşyklarynyň Milli Merkeziniň, Magtymguly adyndaky Ýaşlar guramasynyň Merkezi Geňeşiniň bilelikde yglan eden «Bagtyýarlyk döwri — ylham çeşmesi» atly döredijilik bäsleşiginiň jemi jemlendi. Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby Atamyrat Ýazweliýew hem bäsleşigiň ýeňijisi boldy.
Ýeňijileri sylaglamak dabarasy Jemgyýetçilik guramalarynyň merkezinde geçirildi. Mukaddes Garaşsyzlygymyzyň şanly 31 ýyllygy mynasybetli guralan bäsleşige döredijilik bilen meşgullanýan ýaşlaryň ençemesi gatnaşdy. Olar hödürlän eserlerinde ata Watanymyzyň ösüşleriniň, milli mirasymyzyň, däp-dessurlarymyzyň, pederlerimizden miras galan gymmatlyklarymyzyň waspyny belentden ýetirdiler. Hödürlenen eserleriň iň gowulary «Garagum» žurnalynyň sahypalarynda şöhlelendirildi.
Institumyzyň talyby Atamyrat Ýazweliýew hem bäsleşige özüniň «Ene mährine eýlenen» atly hekaýasyny hödürläp, bäsleşikde ýeňiji bolmagy başardy. Hekaýanyň žurnalyň şu ýylyň 2-nji sanynda çap edilendigini bellemek gerek. Bu hekaýada milli gymmatlyklarymyzyň ähmiýeti durmuş wakasynyň üsti bilen açylyp görkezilýär hem-de okyjyda milli mirasymyza bolan buýsanç duýgularyny oýarýar.
Bäsleşigiň ýeňijilerine Hormat hatlary gowşuryldy hem-de Gahryman Arkadagymyzyň «Ömrümiň manysy» atly baý mazmunly kitaby, şeýle-de bäsleşigiň guramaçylary tarapyndan ýadygärlik sowgatlary berildi. Döwlet derejesinde geçirilýän döredijilik bäsleşiginde ýeňiji bolup, institutymyzyň abraýyny ynamly goraýan talybymyza geljekde-de diňe üstünlikleriň ýaran bolmagyny arzuw edýäris!
Mähriban GANDYMOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.
Bu barada şu ýerde okap bilersiňiz: