“Syýasatşynaslaryň we žurnalistleriň gatnaşmagynda Sebitleýin dialogy” atly halkara Media-forumy
2021-nji ýylyň 30-njy iýunynda Türkmenistanyň Daşary işler ministrliginiň Halkara gatnaşyklary institutynda “Syýasatşynaslaryň we žurnalistleriň gatnaşmagynda Sebitleýin dialogy” atly halkara Media-forum geçirildi. Media-forumy Halkara ynsanperwer ylymlary we ösüş uniwersitetiniň rektory Esen Aýdogdyýew alyp bardy.
Maslahatda Ykdysady hyzmatdaşlyk guramasynyň Baş sekretary, Türki dilli döwletleriň hyzmatdaşlyk geňeşiniň Baş sekretary, Russiýa Federasiýasynyň Astrahan oblastynyň Senagat we tebigy baýlyklar Ministri, “Мир” Döwletara teleradiokompaniýasynyň Başlygynyň orunbasary, Türkmenistanyň Döwlet habarlar agentliginiň başlygy, Russiýanyň “Russia Today” halkara habar beriş teleýaýlymlar ulgamynyň Baş direktory, Türkmenistanyň Telewideniýe, radiogepleşikler we kinematografiýa baradaky döwlet komitetininiň başlygy, Owganystanystan Yslam Respublikasynyň Milli telewideniýesiniň we radiosynyň Baş direktory, Özbegistanyň Milli teleradiokompaniýasynyň başlygy, Russiýa Federasiýasynyň Tatarystan Respublikasynyň “Tatmedia” Metbugat we köpçülikleýin habar beriş serişdeleri boýunça agentliginiň başlygy, Belarus Respublikasynyň Milli Döwlet teleradiokompaniýasynyň başlygy, Türkmenistanyň Telekommunikasiýalar we informatika institutynyň rektory, Gruziýanyň “News Day Georgia” žurnalynyň Baş redaktory, Koreýa Respublikasynyň Ýaýlyma beriş ulgamynyň Halkara gatnaşyklar bölüminiň müdiri, “Türkmen dünýäsi” gazetiniň baş redaktory göni we wideoaragatnaşyk ulgamy arkaly çykyş etdiler.
Forumyň dowamynda häzirki döwürde adamzadyň öňünde duran esasy wezipeler we dünýä döwletleri bilen hoşniýetli gatnaşyklary alyp barmak üçin goýulýan maksatlar dogrusynda giňişleýin gürrüň edildi.
Şeýle uly gerimli media-forumlaryň geçirilmegi, ýurdumyzda žurnalistika ugruny has-da ösdürmekde, kämilleşdirmekde, döwrebäp derejelere ýetirmekde hormatly Prezidentimiziň alyp barýan giň gerimli işleriniň aladalarynyň netijesidir.
Mähriban HUDAÝGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby