SURAT ÇEKMEK BÄSLEŞIGINIŇ JEMLERI JEMLENDI
2024-nji ýylyň 25-nji sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Garaşsyzlygynyň 33 ýyllygy mynasybetli institutynyň “Ýaş alymlar geňeşiniň” we “Ýaş hukukçylar” ylmy gurnagynyň guramagynda Halkara hukugy hünäriniň 1-3-nji ýyl talyplarynyň arasynda yglan edilen “Döwlet özygtyýarlygynyň sütünleri” atly bäsleşigiň jemleri jemlendi.
Milli Liderimiz “Mukaddes Garaşsyzlyk biziň ähli ösüşlerimiziň, şöhratly üstünliklerimiziň binýadydyr. Üçünji müňýyllygyň öň ýanynda — 1991-nji ýylda Türkmenistanyň döwlet Garaşsyzlygy dünýä bileleşigi tarapyndan ykrar edildi. Netijede, ýurdumyzyň jemgyýetçilik-syýasy durmuşynda düýpli özgertmelere badalga berildi. Elbetde, 30 ýyl taryh üçin uzak möhlet däl. Muňa garamazdan, şu döwrüň içinde ýurdumyzyň demokratik, hukuk we dünýewi döwlet gurluşynyň binýatlaryny yzygiderli berkitdik” diýip örän çuň manyly belleýär. Bu barada talyp ýaşlaryň arasynda wagyz etmek, olara düşündirmek has-da ähmiýetli bolup durýar.
Bäsleşigiň şertlerine görä talyplar, “Garaşsyzlyk” we “Hukuk” bilen baglanyşykly suratlar getirdi. Toparlar tarapyndan çekilen suratlaryň her biriniň şygary bolup her topardan bir talyp suratyň many-mazmunyny emin agzalar toparyna 5 minudyň dowamynda açyp görkezdi.
Bäsleşigiň netijeleri professor - mugallymlardan ybarat bolan emin agzalar toparynyň sesleriniň jemi esasynda jemlendi. Bäsleşigiň netijelerine görä, ýer alan topara Hormat haty we ýadygärlik sowgatlar berildi.
Nedir NEDIROW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby