YLMY- AMALY MASLAHAT GEÇİRİLDİ
2025-nji ýylyň 19-njy martynda Türkmenistanyň Daşary işler ministrliginiň Halkara gatnaşyklary institutynda 2024-2025-nji okuw ýylynda geçiriljek ylmy-amaly hem-de ylmy-döredijilik maslahatlaryň meýilnamasynyň çäginde Jemgyýeti öwreniş ylymlary kafedrasynyň garamagynda hereket edýän “Paýhas we parasat” ylmy gurnagynyň gurnamagynda hormatly Prezidentimiziň “Änew müňýyllyklardan gözbaş alýan medeniýet” atly kitaby – türkmen halkynyň şöhratly taryhyny öwrenmekde ygtybarly çeşme” atly ylmy-amaly maslahat geçirildi.
Ýaş nesillerde watançylygy, ynsanperwerligi terbiýelemek, meşhur şahsyýetleriň atlaryny ebedileşdirmek, umumybilim we hünär bilimi maksatlary boýunça okatmagyň usulyýetini guramaçylyk-usuly, innowasion-pedagogik, ylmy-usulyýet nukdaýnazardan has-da kämilleşdirmek, ýaş nesliň döredijilik başarnyklaryny ösdürmek, olary ylma hem-de döredijilige ugrukdyrmak maksady bilen geçirilen ylmy-amaly maslahatyň dowamynda Türkmenistanyň Ylymlar akademiýasynyň taryh we arheologiýa institutynyň esasy ylmy işgäri N. Amanlyýew, Magtymguly adyndaky Türkmen döwlet uniwersitetiniň dünýä taryhy kafedrasynyň mugallymy R.Çarymyradow, şeýle hem Jemgyýeti öwreniş ylymlary kafedrasynyň mugallymlary we “Paýhas we parasat” ylmy gurnagynyň agzalary bolan talyp ýaşlar çykyş etdiler. Olar Arkadagly Gahryman Serdarymyzyň “Änew müňýyllyklardan gözbaş alýan medeniýet” atly kitabynda Türkmenistan döwletiniň ak bugdaýyň Watany bolan Änew şäheriniň öwrenilişi, geçirilen barlaglar, Seýitjemaleddin metjidiniň öwrenilişi, Parfiýanyň Gatar şäheri barada gymmatly taryhy maglumatlar barada ylmy esasda gürrüň berdiler.
Ylmy-amaly maslahatyň dowamynda talyp ýaşlar Änew medeniýetine degişli özlerini gyzyklandyrýan soraglary boýunça pikir alyşdylar.
Aýjemal ORAZGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.