“Türkmenistanda ylym, bilim we innowasiýalar babatynda alnyp barylýan döwlet syýasaty” atly duşuşyk geçirildi
2024-nji ýylyň 22-nji fewralynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlyklygynda Maslahatlar merkezinde geçirilen Türkmenistanyň Halk Maslahatynyň Prezidiumynyň mejlisinde “Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasyny” durmuşa geçirmek boýunça seredilen meseleleriň jemlerine bagyşlanyp, 2024–nji ýylyň 29-njy fewralynda Türkmenistanyň Daşary işler ministrliginiň Halkara gatnaşyklary institutynda “Türkmenistanda ylym, bilim we innowasiýalar babatynda alnyp barylýan döwlet syýasaty” atly duşuşyk geçirildi.
Duşuşyga Türkmenistanyň Bilim ministrliginiň bölüm müdiri Annasapar Kiçiýew, Türkmenistanyň Ylymlar akademiýasynyň Taryh we arheologiýa institutynyň direktorynyň orunbasary Han-Durdy Gurbanow, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymlary, filosofiýa ylymlarynyň kandidaty, sosiologiýa ylymlarynyň doktory Öwezdurdy Muhammetberdiýew, filosofiýa ylymlarynyň kandidaty Begenç Karaýew, Türkmenistanyň Adatdan Daşary we Doly ygtyýarly Ilçisi Nurberdi Amanmyradow we institutyň professor-mugallymlary hem-de magistrleri gatnaşdylar.
Duşuşygyň dowamynda Arkadagly Gahryman Serdarymyzyň tassyklan Maksatnamasy esasynda ýurdumyzda ylym, bilimiň ösüşi, ykdysady, maliýe, durmuş, önümçilik we beýleki wezipeler bilen bir hatarda, kanunçylyk ulgamyna degişli wezipeler öňde goýlup, bu ugurda ýerine ýetirilmeli işleriň möhüm ugurlary barada durlup geçildi.
Duşuşyga gatnaşan alymlar esasy ugurlaryň biri bolan ylmy barlaglaryň depginini ýokarlandyrmagyň, “emeli aňy” düýpli we netijeli öwrenmegiň, ylym, önümçilik babatda işewürligiň hem-de täjirçiligiň täze usullaryny döretmegiň, ösdürmegiň we bu ugurda degişli kadalaşdyryjy hukuk namalaryny taýýarlamagyň möhümdigini bellediler.
Duşuşyga gatnaşyjylar Gahryman Arkadagymyza, Arkadagly Gahryman Serdarymyza ylym, bilimi ösdürmekde, halkymyzyň hal-ýagdaýyny, ýaşaýyş-durmuşyny gowulandyrmak ugrunda giň möçberli işleri, maksatnamalary durmuşa geçirmekde alyp barýan işlerinde üstünlikleri arzuw etdiler.
Suraý AKMYRADOWA,
Türkmenistanyň Daşary işler
ministrliginiň
Halkara gatnaşyklary
institutynyň
Jemgyýeti öwreniş
ylymlary kafedrasynyň mugallymy.