SEBITLEÝIN HYZMATDAŞLYGA BAGYŞLANAN YLMY MASLAHAT
2021-nji ýylyň 18-nji oktýabrynda "Täze Özbegistan we Merkezi Aziýada sebit hyzmatdaşlygy" atly köptaraplaýn ylmy onlaýn maslahaty geçirildi. Merkezi Aziýanyň Halkara instituty we Özbegistandaky Konrad Adenauer gaznasy tarapyndan gurnalan bu foruma Özbegistan, Türkmenistan, Gazagystan, Täjigistan, Gyrgyzystan, Russiýa, ABŞ we Hytaý döwletleriniň ýokary okuw jaýlarynyň wekilleri, şeýle hem Türkmenistanyň Daşary işler ministrliginiň Halkara gatnaşyklar institutynyň rektory Jumamyrat Gurbangeldiýew gatnaşdy.
Rektor öz çykyşynda gün tertibindäki meseleleriň ähmiýetini belläp, türkmen – özbek gatnaşyklarynyň we Merkezi Aziýa sebitinde köptaraplaýyn hyzmatdaşlygy ösdürmekde, durnukly ösüşi, parahatçylygy we howpsuzlygy gazanmakda alnyp barylýan işleriň uly ähmiýete eýedigini nygtady.
Rektoryň belleýşi ýaly, Hormatly Prezidentimiz Gurbanguly Berdimuhamedowyň ýolbaşçylygynda dünýäniň ähli döwletleri, ilkinji nobatda bolsa ýakyn goňşulary bilen dostlukly, deň we özara bähbitli ikitaraplaýyn gatnaşyklary ösdürmek Türkmenistanyň daşary syýasat strategiýasynyň ileri tutulýan ugrudyr. Gepleşikleriň özara düşünişmek we ynanyşmak esasynda alnyp barylmagy häzirki wagtda sebitleýin we global ölçeglerde parahatçylygy, asudalygy we howpsuzlygy üpjün etmegiň esasy şertlerinden biridir. Halkara giňişliginde Türkmenistanyň strategik taýdan möhüm hyzmatdaşlaryndan biri hem Özbegistan Respublikasydyr.
Ýurdumyzyň milli diplomatiýa mekdebiniň ýolbaşçysy gatnaşyjylaryň ünsüni ýangyç - energetika, söwda we ykdysady, ulag - aragatnaşyk ulgamlaryndaky we agrosenagat pudaklaryndaky türkmen - özbek hyzmatdaşlygynyň möhüm meselelerine çekdi we bu ugurda gazanylan ösüşleriň uludygyny belledi.
Ylmy forumyň işi "Merkezi Aziýa ýurtlarynyň garaşsyzlygynyň kynçylyklary: döwlet gurmak we sebiti dikeltmek", "Täze Özbegistan we täze Merkezi Aziýa: özara baglanyşyk pudagynda bilelikdäki ösüş" we "Merkezi Aziýa dünýä ulgamynyň möhüm sebiti hökmünde" ýaly 3 ugur boýunça alnyp baryldy. Bilermenler bu hili gepleşikleriň möhümdigini bellediler we Merkezi Aziýa ýurtlarynyň akademik toparlarynyň arasynda hyzmatdaşlygy dowam etdirmek barada ylalaşdylar.
Maslahatyň ikinji mejlisiniň işine gönüden-göni gatnaşan rektor ösüş ugurlaryny we sebit ýurtlarynyň arasyndaky gatnaşyklaryň içgin öwrenmekde Merkezi Aziýanyň ylmy institutlarynyň arasyndaky gepleşikleri dowam etdirmegiň möhümdigini tekrarlady.
Bu ylmy maslahat sebit ösüşiniň möhüm meseleleri barada pikir alyşmakda möhüm meýdança boldy we sebitdäki ýokary okuw jaýlarynyň arasyndaky ylmy gatnaşyklary berkitdi.
Mukam AŞYROW,
Türkmenistanyň Daşary işler ministrliginiň
Halkara gatnaşyklaryň institutynyň
Halkara gatnaşyklary fakultetiniň II ýyl talyby.