SANLY ULGAM ARKALY WEBINAR GEÇIRILDI
2025-nji ýylyň 17-nji oktýabrynda Türkmenistanyň Daşary işler ministrliginiň Halkara gatnaşyklary institutynda «Bitaraplyk — parahatçylygyň mizemez binýady» atly tema boýunça webinar geçirildi. Oňa ýurdumyzyň ýokary we orta-hünär okuw mekdepleriniň professor-mugallymlary hem-de talyp ýaşlary gatnaşdylar.
Webinarda Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň uly mugallymy, filologiýa ylymlarynyň kandidaty Baba Saryýew çykyş etdi. Ol öz çykyşynyň dowamynda Türkmenistanyň hemişelik Bitaraplygynyň aýratynlyklary, onuň tutuş dünýäde parahatçylygy, howpsuzlygy we durnukly ösüşi berkitmekdäki orny, döwletimiziň alyp barýan parahatçylyk söýüjilikli daşary syýasaty barada giňişleýin gürrüň berdi.
Şeýle webinarlaryň yzygiderli guralmagy talyp ýaşlaryň syýasy düşünjeleriniň kämilleşmegine, goşmaça bilim endikleriniň ýokarlandyrylmagyna uly goşant goşýar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.