Sanly ulgam arkaly webinar geçirildi
2025-nji ýylyň 25-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hemişelik Bitaraplygynyň 30 ýyllygyna, Birleşen Milletler Guramasynyň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmegine bagyşlanan webinar geçirildi. Türkmenistanyň Halkara parahatçylyk we ynanyşmak ýylynyň dowamyndaky işleriniň hem-de ugurlarynyň Konsepsiýasyna laýyklykda geçirilen bu webinarda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň müdiri, Türkmenistanyň Adatdan daşary we Doly ygtyýarly ilçisi, Türkmenistanyň ussat diplomaty, professor, taryh ylymlarynyň doktory, filosofiýa ylymlarynyň kandidaty Amangeldi Rahmanow çykyş etdi.
Webinar “Türkmenistanyň hemişelik Bitaraplygy: taryhy we häzirki wagtda tutýan orny” temasyna bagyşlanyp, oňa sanly ulgam arkaly Türkmenistanyň ýokary we orta hünär okuw mekdepleriniň talyp ýaşlary we mugallymlary gatnaşdylar. Okuw sapagynda halypa diplomat Türkmenistan ýurdumyzyň halkara gatnaşyklarynda alyp barýan hemişelik Bitaraplyk syýasaty we onuň taryhy kökleri, häzirki döwürde parahatçylygy, howpsuzlygy we durnukly ösüşi üpjün etmekde bitaraplyk syýasatynyň ähmiýeti we ýurdumyzyň saýlap alan parahatsöýüjilikli daşary syýasatynyň geçen taryhy döwründe gazanylan üstünlikler dogrusynda gürrüň berdi.
Türkmen milli diplomatiýasyna uly goşant goşan we bu ugurda ençeme ylmy gollanmalaryň awtory bolan halypa diplomatyň geçiren okuw sapagy geljekde diňe bir diplomatiýa ulgamynda däl, eýsem ýurdumyzyň beýleki pudaklarynda hem zähmet çekjek talyp ýaşlaryň bu ugurda bilimlerini artdyrmaklaryna ýardam etdi.
Hojamyrat BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
III ýyl talyby.