Sanly ulgam arkaly geçirilýän okuw sapagynyň nobatdaky sany
2022-nji ýylyň 2-nji martynda Türkmenistanyň Daşary işler ministrliginiň Halkara gatnaşyklary institutynda “Türkmenistanda ýaşlar baradaky döwlet syýasatynyň 2021–2025-nji ýyllar üçin Döwlet maksatnamasyny” üstünlikli amala aşyrmak maksady bilen sanly ulgam arkaly yzygiderli alnyp barylýan okuw maslahatynyň nobatdaky sany geçirildi. Türkmenistanyň Bilim ministrliginiň, Türkmenistanyň Gyzyl Ýarymaý Milli jemgyýetiniň hem-de Türkmenistanyň Sport we ýaşlar syýasaty ministrliginiň bilelikde guran bu okuw sapagyna milli diplomatiýanyň ýokary okuw mekdebiniň talyplary gatnaşdylar.
Bu okuw maslahatyny Ýagşygeldi Kakaýew adyndaky Halkara nebit we gaz uniwersitetiniň wekili alyp bardy. Ol “Türkmenistanyň gender deňligi boýunça 2021–2025-nji ýyllar üçin hereketleriň milli meýilnamasynyň” çäklerinde ýaşlary gender deňligine hormat goýmak ruhunda terbiýelemegiň ähmiýeti we bu işlerde meýletinçileriň orny barada täsirli çykyş etdi.
Okuw sapagynyň barşy talyp ýaşlaryň gyzykly sowal-jogap alyşmalary bilen utgaşdy.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň III ýyl talyby.