“Sanly innowasiýalar” atly bäsleşik
2021-nji ýylyň 13-15-nji aprel aralygynda Türkmenistanyň Ylymlar akademiýasy bilen Bilim ministrliginiň guramagynda ýaşlaryň arasynda geçirilýän programma üpjünçiligi boýunça «Sanly innowasiýalar» atly bäsleşigi geçirildi. «Sanly çözgüt — IT meýdança» hojalyk jemgyýetinde guralýan bäsleşige ýurdumyzyň mekdep okuwçylary, talyplar, ýaş alymlar we hünärmenler işjeň gatnaşdylar. Olar bäsleşigiň innowasion şäher, sanly bilim, söwda we hyzmatlar ulgamy boýunça IT-taslamalar, ýörite ugur, maglumat howpsuzlygy we kiberhowpsuzlyk ugurlary boýunça programma üpjünçiliklerini, taslamalaryny hödürlediler.
«Türkmenistanda sanly ykdysadyýeti ösdürmegiň 2021 — 2025-nji ýyllar üçin Döwlet maksatnamasyny» amala aşyrmagyň çäklerinde guralan bäsleşikde hödürlenen işleriň derwaýyslygyna, ideýasynyň özboluşlylygyna, tehnologik çözgüdine, programmirlemegiň işlenip düzülen diline, interfeýsiniň kämilligine, innowasion täzeçilligine we beýleki aýratynlyklaryna baha berildi. Bu bäsleşige Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň talyplary Jahangir Polatbaýew, Arslankerim Kerimow, Meýlis Hojamyradow, Farhat Şaripow dagylar söwda we hyzmatlar ulgamy hem-de IT-taslamalar ugry boýunça gatnaşdylar. Mugallym Meýlis Nepesowyň ýolbaşçylygynda gatnaşan talyplar topary II derejeli diplom we sowgatlar bilen sylaglandylar.
Aýmyrat GARAŞEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.