SAGDYN DURMUŞ ÝÖRELGESINI ÜNDEÝÄN WAGYZ-NESIHAT DUŞUŞYGY GEÇIRILDI
2026-njy ýylyň 13-nji aprelinde Türkmenistanyň Daşary işler ministrliginiň Halkara gatnaşyklary institutynda «Sagdyn durmuş ýörelgesi» ady bilen wagyz-nesihat duşuşygy geçirildi. Institutyň talyp ýaşlarynyň gatnaşmagynda geçirilen duşuşykda Jemgyýeti öwreniş ylymlary kafedrasynyň mugallymy, institutyň ilkinji ýaşlar guramasynyň başlygy Muhammet Süleýmanow, Türkmenistanyň Saglygy goraýyş we derman senagaty ministrliginiň Aşgabat şäheriniň Arassaçylyk we keselleriň ýaýramagyna garşy göreşmek gullugynyň epidemiolog lukmany Altyn Klyçewa, Türkmenistanyň Saglygy goraýyş we derman senagaty ministrliginiň Aşgabat şäheriniň Berkararlyk etrabynyň Arassaçylyk we keselleriň ýaýramagyna garşy göreşmek gullugynyň parazitolog lukmany Nailýa Gasanowa çykyş etdiler.
Çykyş edenler talyp ýaşlaryň arasynda zyýanly endikleriň adam saglygyna ýetirýän täsirini düşündirmek, ýaşlarda bedenterbiýä bolan islegi artdyrmak, arassaçylyk kadalaryny, dogry iýmitlenmegiň talaplaryny doly berjaý etmek, beden üçin zerur bolan ýokumly iýmitleri kabul etmek, bilen bagly täsirli gürrüňleri berdiler.
Şeýle wagyz-nesihat duşuşyklarynyň geçirilmegi ýurdumyzyň geljegi bolan ýaşlarymyzy watansöýüjilik ruhunda terbiýelemäge, olary zyýanly endiklerden goramaga, sagdyn durmuş ýörelgelerini ýola goýmaga, halal zähmet çekmäge ýardam edýär.
Sare ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
2-nji ýyl talyby.