Sagdyn-durmuş ýörelgelerini ündeýän bäsleşik
2025-nji ýylyň 25-nji dekabrynda Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň guramagynda talyplaryň arasynda adam saglygyna bagyşlanan we sagdyn-durmuş ýörelgelerini ündeýän prezentasiýa bäsleşigi geçirildi. Oňa Halkara žurnalistikasy fakultetiniň 1-nji ýyl talyplary gatnaşdylar. Bäsleşik ady agzalan kafedra tarapyndan yglan edilip, höwesjeň talyplar prezentasiýalaryny tabşyrdylar.
Talyplaryň arasynda adam saglygyna bagyşlanan we sagdyn-durmuş ýörelgelerini ündeýän prezentasiýa bäsleşiginiň şertlerine görä, olar çykyşlarynda sagdyn durmuş ýörelgelerini berjaý etmegiň düzgünleri, adam saglygyna zyýan ýetirýän serişdeler dogrusynda ukyp başarnygy boýunça çykyş etdiler. Bäsleşik gyzgalaňly we işjeň ýagdaýda geçdi. Sagdyn durmuşyň özeni bolan bedenterbiýe we sport prezentasiýa çykyşlaryň aglabasynda giňişleýin agzaldy. Talyplar çykyşlarynda okuwdan boş wagtlary institutyň sport toplumynda türgenleşik geçýändiklerine degişli wideolary hem görkezdiler.
Bäsleşigiň ahyrynda işjeň gatnaşan talyplara degişli orunlar berildi. Bäsleşik örän täsirli geçdi. Şeýle bäsleşikleriň yzygiderli guralmagy talyp-ýaşlaryň sagdyn durmuş ýörelgeleri, bedenterbiýe we sport barada düşünjedir ukyp başarnyklaryny açyp görkezmäge mümkinçilik berýär.
Aýnur MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.