569
SAG BAŞYM – SOLTAN BAŞYM
2021-nji ýylyň 18-nji martynda ýaşlaryň ählitaraplaýyn ösen, beden we ruhy taýdan sagdyn, bilimli-ylymly bolmagyny gazanmak, ýaşlarda ata-babalarymyzyň müňýyllyklaryň dowamynda kemala getiren mertlik, watansöýüjilik, halallyk, päkýüreklilik, arassa ahlaklylyk, zähmetsöýerlik ýaly häsiýetlerini terbiýelemek hem-de olarda milli mirasymyza bolan sarpany kemala getirmek maksady bilen Türkmenistanyň Daşary işler ministrliginiň Halkara gatnaşyklary institutynda “Sag başym - soltan başym” atly maslahat geçirildi. Maslahata Türkmenistanyň Saglygy goraýyş we derman senagaty ministrliginiň wekilleri, şeýle hem institutyň professor-mugallymlary we talyp ýaşlary gatnaşdy. Maslahatda Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa, Aşgabat şäheriniň Talyplar saglyk öýüniň iç keseller lukmany Soltan Aşirowa hem-de şol saglyk öýüniň iç keseller hasabatçy lukmany Täzegül Agamedowa çykyş etdiler. Maslahatda çykyş edenler saglyk, daşky gurşaw, sagdyn durmuş ýörelgesi, gün tertibi, zyýanly endiklerden daşda durmak we gigiýena kadalaryny berjaý etmek barada hem-de Hormatly Prezidentimiz tarapyndan saglyk ulgamynda durmuşa ornaşdyrylýan işler dogrusynda giňişleýin gürrüň berdiler. Maslahatda edilen çykyşlar oňa gatnaşyjylarda uly täsir galdyrdy.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby