Ruhubelentlige beslenen bag ekiş dabarasy
2021-nji ýylyň 20-nji martynda Diýarymyzda mukaddes Garaşsyzlygymyzyň şanly 30 ýyllygy mynasybetli geçirilen ählihalk bag ekiş dabarasyna Türkmenistanyň Daşary işler ministrliginiň Halkara gatnaşyklary institutynyň professor-mugallymlary we talyplary hem işjeň gatnaşdylar. Ýurdumyzyň daşary syýasat edarasynyň tokaý zolagynda daň säher bilen gyzgalaňly başlanan bag ekiş dabarasynyň barşynda çukurlar gazylyp, agaç nahallarynyň 2 müňden gowragy ekildi. Şeýle hem ruhubelentlige beslenen ählihalk çäresiniň barşynda öňki baglara talabalaýyk ideg edildi, arassaçylyk-abadançylyk işleri bilen meşgullanyldy.
Şol gün ählihalk bag ekiş dabarasynyň çäginde Halkara gatnaşyklary institutynda geçirilen ýowara hem bu ýokary okuw mekdebiniň talyplary işjeň gatnaşdylar. Olar institutyň çäginde we ýanaşyk ýerlerde ösüp oturan baglara ideg etdiler. Agaçlaryň düýplerini agardyp, haşal otlary aýryp, tarp ýerleri depdiler. Talyplar şeýle hem abadançylyk işlerini ýerine ýetirdiler.
Ählihalk bag ekiş dabarasynyň ahyrynda oňa gatnaşyjylar ýurdumyzy bagy-bossanlyga öwürmekde amala aşyrýan beýik işleri üçin hormatly Prezidentimiziň adyna alkyş sözlerini aýtdylar.
Sona HALYKOWA,
Türkmenistanyň Daşary işler ministrliginiň
Halkara gatnaşyklary institutynyň 3 ýyl talyby