Arkadag Serdarly bagtyýar ýaşlar ýylynyň netijesi boýunça sylaglamak dabarasy
2023-nji ýylyň 29-njy dekabrynda Türkmenistanyň Daşary işler ministrliginiň Halkara gatnaşyklary institutynda Arkadag Serdarly bagtyýar ýaşlar ýylynyň netijesi boýunça ýylyň dowamynda aýratyn tapawutlanan ýaşlary we mugallymlary sylaglamak dabarasy geçirildi.
Dabarada halkara olimpiadalara we bäsleşiklere gatnaşyp, baýrakly orna mynasyp bolan, Halkara Bitaraplyk gününe bagyşlanyp geçirilen aýdym-sazly dabarasyna gatnaşyp çykyş eden talyp ýaşlara, şeýle-de halkara olimpiadalara we bäsleşiklere gatnaşyp baýrakly orunlary almakda talyplara halypalyk eden professor mugallymlara Türkmenistanyň Telekeçiler we senagatçylar partiýasynyň, “Türkmenportal” hojalyk jemgyýetiniň, Magtymguly adyndaky Ýaşlar guramasynyň, “Galam” hojalyk jemgyýetiniň we “Nestle” kompaniýasynyň Türkmenistandaky wekilhanasynyň ýokary derejedäki sylaglary gowşuryldy.
Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew sylaga mynasyp bolan professor– mugallymlary, şeýle-de talyp ýaşlary gazanan üstünlikleri bilen gutlap, geljek ýyllarda hem tutanýerli zähmetleri bilen Watanymyzyň rowaçlyklaryna goşant goşmaklaryny arzuw etdi. Sylaga mynasyp bolan mugallymlar we talyplar gazanan üstünliklerine şeýle ýokary baha berýändikleri üçin Gahryman Arkadagymyza we Arkadagly Gahryman Serdarymyza hoşallyk sözlerini beýan etdiler.
Şeýle hem dabaranyň dowamynda institutyň çeper höwesjeňler topary Täze ýyl baýramçylygyna bagyşlanan aýdym-sazly çykyşlaryny ýerine ýetirdiler.
Aýgözel AŞIROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň
öwreniji mugallymy.