«PÄHIM – PAÝHAS UMMANY MAGTYMGULY PYRAGY» ATLY DÖREDIJILIK BÄSLEŞIGI
2024-nji ýylyñ 4-nji martynda Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň «Ýaş hukukçylar» ylmy gurnagy tarapyndan «Pähim – paýhas ummany Magtymguly Pyragy» atly döredijilik bäsleşigi geçirildi. Oňa institutyň ähli fakultetleriniň talyplary gatnaşdylar we özleriniň döredijilik başarnyklaryny görkezdiler. Bäsleşigiň maksady Magtymguly Pyragynyň döredijiligini ýaş nesliň arasynda wagyz etmekden we ýaşlary watançylyk ruhunda terbiýelemekden ybaratdyr.
Bäsleşik üç şertden, ýagny I şerti gatnaşyjy toparlar 3 minudyň dowamynda Magtymguly Pyragynyň ömri-döredijiligini wasp edip çykyş etmekden, II şerti gatnaşyjy toparyň bir talyby Magtymguly Pyragynyň watançylyk ruhundaky bir goşgusyny labyzly ýatdan aýdyp bermekden we III şerti gatnaşyjy toparlar tarapyndan öňünden taýýarlanylan Magtymguly Pyragynyň çekilen suratyny emin agzalar toparyna hödürlemekden ybarat.
Çekeleşikli geçen bäsleşigiň netijelerine laýyklykda, Halkara žurnalistikasy fakultetiniň talyplary I orna mynasyp boldular.
Muhammetmyrat AMANMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.