ORTA MEKDEPLERIŇ ÝOKARY SYNP OKUWÇYLARY BILEN ÇÄRE GEÇIRILDI
2025-nji ýylyň 14-nji aprelinde Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň «Lingvo World» we «EcoClub» gurnaklarynyň guramagynda «2025 ýyl – Halkara parahatçylyk we ynanyşmak ýyly» mynasybetli ýurdumyzyň orta mekdepleriniň ýokary synp okuwçylary bilen duşuşyk geçirildi.
Duşuşykda Halkara žurnalistikasy fakultetiniň I ýyl talyby Meret Meredow, Halkara gatnaşyklary fakultetiniň I ýyl talyby Guwanç Alyýew dagy çykyş etdiler. Olar öz çykyşlarynda Türkmenistanyň Bitaraplyk derejesiniň taryhy, häzirki döwürde halkara gatnaşyklaryndaky orny, ýurdumyzyň parahatçylyksöýüji, hoşniýetli daşary syýasaty barada giňişleýin gürrüň berdiler. Şeýle-de biziň ýurdumyz tarapyndan teklip edilip, BMG-niň Baş Assambleýasy tarapyndan «2025 ýyl – Halkara parahatçylyk we ynanyşmak ýyly» diýip yglan edilmegi dünýä ähmiýetli waka hökmünde kabul edilendigi, Türkmenistanyň bu ädimi ähli döwletlere parahatçylyk we ynam düşünjesini dünýä gurluşynyň esasy ýörelgesi hökmünde durmuşa geçirmekde syýasy, dünýägaraýyş we amaly taýdan bilelikde iş alyp barmaga çagyrýandygy barada buýsanç bilen nygtadylar.
Duşuşygyň ahyrynda oňa gatnaşan mekdep okuwçylary ýurdumyzyň hemişelik Bitaraplygy barada özlerini gyzyklandyrýan sowallary bilen ýüzlenip, kanagatlanarly jogaplary aldylar.
Enejan ORAZMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.