Ussat fotohabarçy talyplar bilen tejribesini paýlaşdy
2025-nji ýylyň 24-nji dekabrynda Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 4-nji ýyl talyplary üçin fotožurnalistika dersinden ýörite okuw sapagy geçirildi. Oňa Türkmenistanyň Döwlet habarlar agentliginiň ussat fotohabarçysy, ömrüni şu asylly käre bagyş eden Meretdurdy Rozyýew gatnaşdy.
Sapagyň dowamynda halypa fotohabarçy fotožurnalistika ugrunda toplan baý tejribesi, döredijilik ýolunda duş gelen gyzykly wakalary hem-de häzirki zaman fotožurnalistikada möhüm usullary barada giňişleýin gürrüň berdi. Şeýle-de ol kämil fotohabarçy, fotožurnalist üçin kompozisiýanyň, ýagtylygyň we pursaty dogry saýlamagyň ähmiýetini belläp, gazet-žurnallar, internet saýtlary üçin surata düşürmegiň inçe syrlaryny düşündirdi. Halypa özüniň düşüren şowly suratlaryny talyplara görkezdi hem-de her bir suratyň döreýiş taryhy barada düşündiriş berdi. Okuw sapagy talyplarda uly gyzyklanma döretdi. Onuň ahyrynda talyplar özlerini gyzyklandyrýan sowallary berip, tejribeli fotosuratçydan peýdaly maslahatlary aldylar.
Geçirilen bu okuw sapagy geljekki halkaraçy žurnalistleriň fotožurnalistleriň hünär taýdan kämilleşmegine uly itergi berdi hem-de olaryň döredijilik dünýägaraýşyny has-da giňeltdi.
Güljemile DÄDEBAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.