ONLAÝN OKUW USULY MASLAHATY GEÇIRILDI
2025-nji ýylyň 7-nji oktýabrynda Türkmenistanyň Bilim ministrligi ýurdumyzda ýaşlar syýasaty babatynda alnyp barylýan işleri kämilleşdirmek maksady bilen taýýarlanan degişli taslamalar boýunça Türkmen döwlet ykdysadyýet we dolandyryş instituty tarapyndan onlaýn okuw usuly maslahaty geçirildi. Maslahata Türkmenistanyň Daşary işler ministrliginiň Halkara gatnaşyklary institutynyň Ilkinji Ýaşlar guramasynyň, Ýaş alymlar geňeşiniň başlyklary we talyplar gatnaşdylar.
Bu onlaýn okuw usuly maslahatynyň dowamynda IT, oba hojalygy, “Ýaşyl ykdysadyýet” ýaly möhüm pudaklarda ýaş telekeçiler üçin goldaw programmalaryny döretmek we has netijeli taslamalar üçin grantlary we salgyt ýeňilliklerini bermek, başlangyç kärhanalary goldamak boýunça maksatnamasy hem-de “Ýaşlaryň başlangyç kärhanalarynyň inkubatorlary” ulgamyny döretmegiň mehanizmi barada gürrüň edildi.
Okuw maslahatynda esasan hem häzirki döwrüň ençeme möhüm wezipeleri, düýpli meseleleri çözmekde täze usullary işläp taýýarlamagy talap edýändigi, bu meseleleriň hatarynda ekologiýa howpsuzlygy ýaly ählumumy howpsuzlyk bilen bagly meseleleriň hem bardygy, olary ýöriteleşdirilen halkara guramalar we dünýä döwletleri bilen ýakyndan hyzmatdaşlykda çözmek ýurdumyzyň daşary syýasatynyň esasy ugurlarynyň biri hökmünde kesgitlenilendigi baradaky meselelere seredildi.
Bagtyýar AGAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.