ONLAÝN OKUW SAPAGY GEÇIRILDI
2021-nji ýylyň 13-nji martynda şu ýylyň 6-12-nji sentýabry we 13-17-nji oktýabry aralygynda Aşgabat şäherinde degişlilikde geçiriljek Dewisiň Kubogy ugrundaky halkara ýaryşyna hem-de Welotrek boýunça dünýä çempionatyna talyplaryň meýletinçiler hökmünde gatnaşmaklaryna bagyşlanyp ýurt derejesinde onlaýn okuw sapagy guraldy. Türkmenistanyň Bilim ministrliginiň guramagynda geçirilen bu okuw sapagyna ýurdumyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň meýletinçi talyp ýaşlary gatnaşdylar.
Wideoşekilli sanly ulgam arkaly geçirilen okuw sapagyny Türkmen döwlet binagärlik-gurluşyk institutynyň, Türkmen döwlet ykdysadyýet we dolandyryş institutynyň hem-de Türkmen döwlet bedenterbiýe we sport institutynyň mugallymlary alyp bardylar. Olar ýaş meýletinçileriň öňünde dil endiklerini ösdürmegiň we meýletinçiligiň dürli ugurlaryny tanyşdyrmagyň meseleleri boýunça çykyş etdiler.
Okuw sapagynyň ahyrynda oňa gatnaşyjylar hormatly Prezidentimize ýaş talyplaryň halkara derejesinde geçirilýän ýaryşlara meýletinçiler hökmünde gatnaşyp bilmekleri ugrunda döredip berýän giň mümkinçilikleri üçin alkyş sözlerini aýtdylar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby