Onlaýn açyk sapagy geçirildi
2025-nji ýylyň 10-njy dekabrynda Myrat Garryýew adyndaky Türkmenistanyň Döwlet lukmançylyk uniwersitetiniň guramagynda "Çagalaryň we ýetginjekleriň fiziki ösüşine baha bermeklik we onuň barlanyş usullary" atly tema boýunça ýokary okuw mekdepleriniň pedagogik işgärleriniň we talyp ýaşlarynyň gatnaşmagynda onlaýn açyk sapagy geçirildi. Bu açyk sapaga Türkmenistanyň Daşary işler ministrliginiň Halkara gatnaşyklary institutynyň mugallymlary hem-de talyp ýaşlary işjeň gatnaşdy.
Bu sapak diňe bir fiziki ösüşiň ylmy ölçeglerini düşündirmek bilen çäklenmän, eýsem, her bir çaganyň ösüşini yzygiderli yzarlamagyň ynsan saglygy we jemgyýetiň geljegi üçin nähili çuňňur ähmiýete eýedigini aýdyň görkezdi. Çykyş edenler keselleriň öňüni almakda sagdyn durmuş ýörelgesiniň we dogry iýmitlenmegiň ornunyň uludygyny aýratyn bellediler. Şunda Gahryman Arkadagymyzyň ýolbaşçylygynda işlenip düzülen «Saglyk» Döwlet maksatnamasynyň, şeýle hem ýaşlaryň arasynda sportuň we köpçülikleýin bedenterbiýäniň ähmiýetini düşündirmek boýunça döwlet syýasatynyň ähmiýeti nygtaldy.
Açyk sapaga gatnaşyjylar milli saglygy goraýyş ulgamynda düýpli özgertmeleri durmuşa geçirip, halkymyzyň, aýratyn-da ýaş nesliň saglygyny goramaga aýratyn üns berýän Milli Liderimize hem-de hormatly Prezidentimize tüýs ýürekden sagbolsun aýtdylar.
Şeýle açyk sapaklaryň yzygiderli geçirilmegi ýaşlaryň arasynda sagdyn durmuş ýörelgesini wagyz etmekde möhüm ähmiýete eýedir.
Aýgözel AMANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 2-nji ýyl talyby.