ÖMRÜMIZIŇ HOWPSUZLYGY — RAHATLYGYŇ KEPILI
2025-nji ýylyň 24-nji sentýabrynda Türkmenistanyň Daşary işler ministrliginiň Halkara gatnaşyklary institutynda Žurnalistikanyň nazaryýeti we amalyýeti kafedrasynyň guramagynda Halkara žurnalistikasy fakultetiniň talyplaryna okuw sapagy geçirildi. Oňa fakultetiň dürli ýyldaky talyplary gatnaşdylar. Her ýylyň sentýabr aýynda «Ýol hereketiniň howpsuzlygy — ömrümiziň rahatlygy» atly biraýlygyň çäklerinde ýurdumyzyň görkana ýollarynda hereket howpsuzlygyny üpjün etmek boýunça ähli ulgamlarda dürli çäreler geçirilýär. Türkmenistanyň Daşary işler ministrliginiň Halkara gatnaşyklary institutynda hem yzygiderli düşündiriş işleri, wagyz-ündew maslahatlary guralýar.
Okuw sapagynda ýol hereketiniň düzgünleri boýunça düşündirişler, maslahatlar, geçelgeli ýerlerden geçmek, ýol yşyklaryna üns bermek, ýollarda tertip-düzgüni dogry berjaý etmek, pyýadalaryň we ýolagçylaryň borçlary barada giňişleýin gürrüň edildi. Talyplar bilen guralan sapagyň dowamynda ýol hereketi boýunça soraglara jogaplar berildi. Şeýle hem ýol hereketi boýunça talyplaryň hem pikirleri diňlenildi.
Ogulbike YMAMBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallym-öwrenijisi.