OKUW-USULY MASLAHATY GEÇIRILDI
2025-nji ýylyň 11-nji noýabrynda Türkmenistanyň Daşary işler ministrliginiň Halkara gatnaşyklary institutynda “Impakt faktor, hirşiň indeksi, salgylanma indeksi” atly okuw-usuly maslahaty geçirildi. Bu maslahata institutyň kafedralarynyň mugallymlary gatnaşdylar. Maslahaty Halkara ynsanperwer ylymlary we ösüş uniwersitetiniň Halkara gatnaşyklary kafedrasynyň müdiri Arslan Çaryýew alyp bardy.
Okuw-usuly maslahatynyň dowamynda A.Çaryýew ylmy makalalar ýazylanda olarda impakt faktor, hirşiň hem-de salgylanma indeksleriniň orny we ähmiýeti barada giňişleýin gürrüň berdi. Mundan başga-da, salgylanma indeksleriniň görnüşleri barada, şeýle hem “Scopus”, “Google Scholar” we “Russian Science Citation Index” degişli bibliometrik görekzijileri barada belläp geçdi.
Maslahatyň ahyrynda oňa gatnaşyjylar özüni gyzyklandyrýan sowallar bilen ýüzlendiler. Şeýle okuw-usuly maslahatlaryň yzygiderli geçirilmegi mugallymlaryň hünär kämilligini ýokarlandyrmaga we bu ugurda ylmy üstünlikleri iş ýüzünde durmuşa geçirmäge ýardam berýär.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň mugallym-öwrenijisi.