OKUW SEMINARY GEÇIRILDI
2025-nji ýylyň 29-njy awgustynda Türkmenistanyň Daşary işler ministrliginiň Halkara gatnaşyklary institutynda Okuw-usulyýet toparynyň guramagynda okuw seminary geçirildi. Oňa institutyň professor-mugallymlary gatnaşdylar. Seminarda institutyň okuw bölüminiň hünärmeni, filologiýa ylymlarynyň kandidaty A.Kuwwadow, Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty O.Ezimowa, Dünýä dilleri kafedrasynyň müdiri M.Atajanowa, şeýle-de institutyň Okuw-usulyýet toparynyň ýolbaşçysy O.Hemzaýew çykyş etdiler.
Halypa mugallymlar okadylýan okuw dersleriň iş maksatnamalaryny kafedralar boýunça seljerip, täze 2025–2026-njy okuw ýyly üçin taýýarlanandygy barada habar berdiler. Okadylýan dersleri täze maglumatlar bilen baýlaşdyrmak, sanly ulgama esaslanýan tehnologiýalardan peýdalanmak, talyplara daşary ýurt dillerini öwrenmeklige köpçülikleýin esasda gyzyklanma döretmek bilen bagly meselelere seredildi. Okuw seminarda täze 2025–2026-njy okuw ýylynda sapaklaryň ýola goýluşy we olary okatmagyň hilini kämilleşdirmek barada tekliplere garaldy. Şeýle hem institutyň okuw-usulyýet toparynyň ýolbaşçysy 2025–2026-njy okuw ýyly üçin iş meýilnamasy bilen tanyşdyrdy.
Miwe NABATOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň
nazaryýeti we amalyýeti kafedrasynyň mugallymy.