OKUW SAPARYNDA BOLAN TALYPLAR TEJRIBELERINI PAÝLAŞDYLAR
Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň 4-nji ýyl talyplary Umyt Annagylyjowa we Amanbagt Ussaýewa 2024-nji ýylyň 14-18-nji maýy aralygynda Gazagystan Respublikasynyň Almata şäherinde Ýewropa Geňeşiniň we Ýewropa Bileleşiginiň 4 ýyllyk bilelikdäki maksatnamasynyň çäklerinde Merkezi Aziýa döwletleriniň hukuk ugrunda okaýan talyplary üçin gurnalan “Adam hukuklary we daşky gurşaw” atly okuw sapagyna ýagny, Ýaz mekdebine gatnaşyp tejribelik saparynda boldular.
2024-nji ýylyň 6-njy iýunynda U.Annagylyjowa we A.Ussaýewa institutyň talyplary bilen özleriniň tejribelerini paýlaşdylar. Daşary ýurtda saparda bolan talyplar, öz alan tejribeleri dogrusynda prezentasiýa görnüşinde çykyş edip, adam hukuklary we daşky gurşawy goramak babatynda taýýarlanan wideorolik görkezdiler.
Has takygy, çykyş eden talyplar bu okuw sapagyna Gazagystan Respublikasyndan, Gyrgyz Respublikasyndan, Özbegistan Respublikasyndan, Täjigistan Respublikasyndan we Türkmenistandan hukuk hünärinde okaýan talyp ýaşlaryň jemi 40-dan gowragy gatnaşandygyny aýdyp, onuň dowamynda Ýewropa Bileleşiginiň Adam hukuklary boýunça birnäçe hünärmenleriniň we Gazagystan Respublikasynyň ýokary okuw mekdepleriniň professorlarynyň täsirli çykyş edendiklerini bellediler.
Mundan başga-da, U.Annagylyjowa wideoroligiň üsti arkaly özüniň bu ugurda alyp barýan ylmy işi bilen bagly gyzykly maglumatlary hem talyp ýaşlaryň dykgatyna ýetirdi. Şeýle hem talyplar adam hukuklary, daşky gurşawy goramak, howanyň üýtgemegi we onuň adamzada ýetirýän zyýanly täsirleri baradaky alan tejribelerini we bu ugurlarda ýüze çykýan dawaly ýagdaýlary kazyýetde dogry netije çykarmak we üstünlikli çykyş etmek ukybyny ösdürmek bilen bagly ýerine ýetiren ýumuşlaryny deň-duşlary bilen paýlaşdylar. Talyplaryň okuw sapary dogrusynda özara sorag-jogap alyşmaklary aýratyn täsirliligi bilen tapawutlandy.
Gazagystan Respublikasynyň Almata şäherine guralan okuw sapary talyplaryň halkara hukugy ugrundan kämil hünärmenler bolup kemala gelmeginde uly tejribe mekdebi bolup durýar. Talyp ýaşlar özleriniň saýlap alan hünärlerini kämilleşdirmekleri üçin giň mümkinçilikleri döredýän türkmen halkynyň Milli Lideri Gahryman arkadagymyza, Arkadagly Gahryman Serdarymyza tüýs ýürekden hoşallyklaryny bildirýärler.
Kerwen MUHAMMETGELDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň V ýyl talyby.