Okuw maslahatynyň nobatdaky tapgyry
2021-nji ýylyň 24-nji martynda Türkmenistanyň Daşary işler ministrliginiň Halkara gatnaşyklary institutynyň talyplarynyň gatnaşmagynda Türkmenistanyň Bilim ministrliginiň, Türkmenistanyň Gyzyl Ýarymaý Milli jemgyýetiniň, Türkmenistanyň Sport we ýaşlar syýasaty ministrliginiň bilelikde “Türkmenistanda ýaşlar baradaky döwlet syýasatynyň 2021-2025-nji ýyllar üçin Döwlet maksatnamasyny” üstünlikli amala aşyrmak maksady bilen yzygiderli sanly ulgam arkaly okuw maslahatynyň nobatdaky sany geçirildi.
Bu okuw maslahatyny Myrat Garryýew adyndaky Türkmenistanyň Döwlet lukmançylyk uniwersitetiniň wekili alyp bardy. Ol sagdyn jemgyýeti döretmekde sagdyn durmuş ýörelgesiniň ähmiýeti we zyýanly endikleriň adam bedenine edýän zyýany barada belläp, şeýle-de, interaktiw sapaklaryň, okuwlaryň, oýunlaryň we seminarlaryň geçirilişi barada aýdyp geçdi. Maslahatyň dowamynda mugallymlaryň çykyşlary, talyp ýaşlar bilen gyzykly sorag-jogap alyşmalar täsirliligi bilen tapawutlandy.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby