Nobatdaky okuw sapagy
2021-nji ýylyň 15-nji iýunynda Türkmenistanyň Gyrgyz Respublikasyndaky Adatdan daşary we Doly ygtyýarly ilçisi Şadurdy Meredow Türkmenistanyň Daşary işler ministrliginiň Halkara gatnaşyklary institutynyň talyplaryna wideoaragatnaşyk arkaly okuw sapagyny geçirdi. Bu okuw sapagy Türkmenistanyň Daşary işler ministrligi tarapyndan gurnalýan toplumlaýyn onlaýn sapaklarynyň nobatdakysy bolup, institutyň talyplarynyň diplomatiýa bilen bagly bilim derejesini has hem kämilleşdirmek maksady bilen geçirilýär.
Okuw sapagynyň dowamynda hormatly ilçi Türkmenistanyň we Gyrgyz Respublikasynyň arasynda energetika pudagynda alnyp barylýan hyzmatdaşlyk barada giňişleýin maglumat berdi. Wideoaragatnaşyk ulgamy arkaly geçen okuw sapagyň barşynda Türkmenistan bilen Gyrgyz Respublikasynyň arasyndaky dostlukly gatnaşyklar barada talyp ýaşlara gürrüň berildi.
Okuw sapagynyň ahyrynda talyplar hormatly ilçä iki dostlukly ýurduň arasyndaky özara bähbitli hyzmatdaşlygy ösdürmäge gönükdirilen sowallary berdiler we bu ugurda özara pikir alyşdylar.
Laçyn HOJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.