Talyplar rus dili boýunça ilkinji dünýä çempionatyna ýeňiş bilen başladylar
Russiýanyň Ylymlar we ýokary bilim ministrligi hem-de «Социоцентр» Federal döwlet awtonom ylmy edarasy daşary ýurt raýatlary üçin rus dili boýunça ilkinji dünýä çempionatyny geçirýär. Hususan-da, 2024-nji ýylyň 7-nji oktýabrynda Türkmenistanyň Daşary işler ministrliginiň Halkara gatnaşyklary institutynyň topary saýlama tapgyrynda ýokary netijeleri görkezip, bäsleşigiň indiki tapgyryna gatnaşmaga mümkinçilik gazandy. Toparyň düzümi institutymyzyň rus dili mugallymy Maýa Çaryýewa, şeýle hem Halkara žurnalistikasy fakultetiniň talyplary Jennet Myradowa, Orazjemal Çaryýarowa, Annaberdi Kaşaňow, Seýran Sopyýew we halkara gatnaşyklary fakultetiniň talyby Aýgül Meredowadan ybarat.
Çempionatyň düzgünlerine laýyklykda, bu bäsleşige 16-dan 22 ýaşa çenli bolan daşary ýurt raýatlaryndan düzülýän 5 adamdan we mugallymdan ybarat topar gatnaşýar. Çempionat hasaba alynmak, saýlama, aralyk we ýüzbe-ýüz bäsleşiklerden ybarat bolup, gatnaşyjylara dürli ýaryşlar, debatlar, blitzler, onlaýn testler we intellekt bäsleşikler garaşýar. Mugallymlary çempionata gatnaşmaga taýýarlamak maksady bilen onlaýn görnüşinde hünär derejesini ýokarlandyryş okuw sapaklary geçirildi.
Bäsleşigiň jemleýji tapgyry 2024-nji ýylyň dekabr aýynda Sankt-Peterburgda geçiriler. Bäsleşikleriň ýeňijileri çempionatyň Kubogy we rus dili boýunça dünýä çempionlary diýen at bilen sylaglanarlar.
Biz, toparymyza we olaryň mugallymyna dünýäniň rus dili boýunça çempionlary diýen abraýly ada eýe bolmaklaryny arzuw edýäris!
Nurmuhammet ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.