Mukaddes enäniň görelde mekdebi
“Türkmenistan — parahatçylygyň we ynanyşmagyň Watany” ýylynda, ak mermere beslenen Aşgabat şäherimiziň esaslandyrylmagynyň 140 ýyllygynyň sanlyja günden uly toý-dabara bilen bellenilmeginiň öňüsyrasynda gelip gowşan hoş habar arkaly, her bir raýatymyzyň bize miras galdyran altyndan gymmatly, kümüş saçly ene-mamalarymyzyň arzuw-hyýaly siňen el-işine bolan hormatyň ýene bir gezek türkmen halkynyň aýratynlygyny wasp edýändiginiň şaýady bolduk.
Türkmenistanyň Daşary işler ministrliginiň Halkara gatnaşyklary institutynyň uly mejlisler zalynda ähli talyp gyzlar, zenan mugallymlar we bu bilim ojagynda zähmet çekýän ähli gelin-gyzlar Hormatly Prezidentimiziň mähriban käbesi Ogulabat ejäniň ýürek mähri, köňül arzuwlary siňdirilen ajaýyp kürtäniň Türkmenistanyň Döwlet medeniýet merkeziniň Döwlet muzeýine gowşurylmagy mynasybetli geçirilen çärä teleýaýlym arkaly tomaşa etdiler. Çärede çykyş eden mugallymlar baýdaga deňelýän türkmen zenanynyň maşgalada tutýan orny, Gahryman Arkadagymyzyň eli çeper zenanlarymyzyň zähmetine aýratyn sarpa goýýandygy, el hünäriniň elden-ele, nesilden-nesle geçmegi, kämilleşdirilip, döwrebap derejede ösdürilmegi babatda ähli amatlyklary döredýändigi barada söhbet açdylar. Maşgalada erkek kişi eklenç başynda bolsa-da, zenan elmydama oňa goltgy-kömek berip, öýüni bezäp, çagasyna hünär üsti bilen terbiýe bermegi, milli aýratynlygymyza sarpa goýmagy öwretmegi başarýan ilkinji mugallymydyr. Türkmen halky perzendiniň terbiýesine uly üns berýär, gyz çaganyň terbiýesine aýratyn çemeleşýär. Onuň terbiýesi, ar-namysy belentde pasyrdaýan tuguna deňeýär. Şol sebäpli, kiçilikden olara senetçiligiň dürli ugurlaryny öwredip, hünär bermäge, ünsüni jemläp, bir işe jür ýapyşmaklyk endigini kemala getirip, onuň häsiýetine öwürmekligi başarýar. Ýaş aýratynlygyna baglylykda alaja iýşmek, keşde çekmek, ýüň darap, ik egirmek, keçe gülletmek, halyny gyzyllamak, pişme bişirip, çelpek ýaýmak işine işjeň gatnaşmaklaryna çalyşýarlar. Görüm-görelde terbiýeçilik usuly ynsanyň aňyna, özüni alyp barşyna iňňän uly täsir edýär. Görelde bolmak üçin görelde alarlykly hereket etmek, gep-sözünde, edep-ekramynda, geýim-gejiminde, bir söz bilen aýdylanda, ähli babatda hemmetaraplaýyn nusga bolmagy başaran Ogulabat ejäniň on barmagynyň hünäri bilen, inçeden nepis keşde gaýap, bary ýogy ýigrimi günüň dowamynda gyzyl kürtäni taýýarlamagy, hakyky türkmen zenanynyň tutanýerli, yhlasly, edaly, maşgala gatnaşyklaryny has hem berkitmek ugrunda ähli zenanlara, ösüp gelýän ýaş neslimize görelde mekdebi bolup durýar.
Berkarar döwletimiziň bagtyýarlyk döwründe dünýä derejesinde bilim bermek bilen birlikde, milli ruhda terbiýe bermek häzirki wagtda ähli mugallymlaryň öňünde duran mukaddes borçdur!
Gülşat Ýusupowa,
Türkmenistanyň Daşary işler ministrliginiň
Halkara
gatnaşyklary institutynyň
okuw işleri boýunça prorektory