Rus diliniň gününe bagyşlanan çäre
2023-nji ýylyň 4-nji iýunynda Aşgabat şäherinde ýerleşýän “Aşgabat” seýilgähinde Russiýa Federasiýasynyň Türkmenistandaky ilçihanasynyň guramagynda rus diliniň güni mynasybetli rus halkynyň görnükli ýazyjysy hem şahyry A.S.Puşkiniň doglan gününe bagyşlanan çäre geçirildi. Ýörite meýilnama esasynda guralan çäräniň dowamynda A.S.Puşkiniň “Altyn balyk” eseriniň esasynda sahna görkezildi. Sahnalaşdyrylan eser dürli ýaşdaky tomaşaçylarda uly täsir galdyrdy. Çärä paýtagtymyzyň ýaşaýjylary we myhmanlary bilen birlikde Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyp ýaşlary hem işjeň gatnaşdylar. Rus şahyrlarynyň goşgularyny çeper okamak, ýaňyltmaçlary dogry aýtmagy başarmak ýaly bäsleşikler gatnaşyjylarda rus dilini öwrenmäge we bar bolan dil ukyplaryny kämilleşdirmäge bolan höweslerini artdyrdy.
Batyrmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.