Merkezi Aziýa döwletleriniň ýaşlar dialogynyň ikinji duşuşygy geçirilýär
2025-nji ýylyň 16-njy aprelinde Nýu-Ýork şäherindäki Birleşen Milletler Guramasynyň (BMG) ştab-kwartirasynda Merkezi Aziýa döwletleriniň ýaşlarynyň dialogynyň ikinji duşuşygy geçirilýär. Türkmenistanyň başlangyjy bilen 2023-nji ýylyň oktýabr aýynda Arkadag şäherinde ilkinji gezek başy başlanan bu dialog sebitiň ýurtlarynyň ýaşlarynyň arasynda parahatçylygy, ynanyşmagy we hyzmatdaşlygy pugtalandyrmak maksady bilen guralýan halkara derejesindäki möhüm çäreleriň biri hökmünde giňden tanalýar.
Duşuşyk BMG-niň Ykdysady we Durmuş Geňeşiniň (ECOSOC) ýaşlar forumynyň ýokary derejeli mejlisiniň çäklerinde geçirilýär. Bu ýylky duşuşyk BMG-niň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýip yglan edilmegi hem-de BMG-niň Howpsuzlyk Geňeşiniň “Ýaşlar, Parahatçylyk we Howpsuzlyk” baradaky 2250-nji Kararnamasynyň kabul edilmeginiň 10 ýyllygy bilen baglanyşyklylykda “Parahatçylyk we ynanyşmak üçin ýaşlaryň sesleri” (Voices of Youth for Peace and Trust) diýen şygar astynda geçirilýär.
Forumyň çäklerinde oňa gatnaşyjylar häzirki döwürde durmuşa geçirilýän ýaşlar başlangyçlary bilen çykyş edip, parahatçylyk medeniýetiniň ösdürilmegi, ynanyşmagyň pugtalandyrylmagy, durnukly bilim ulgamynyň kemala getirilmegi, jemgyýetçilik telekeçiligi we innowasiýalary ösdürmek meseleleri boýunça pikir alyşarlar.
Duşuşyga ýurdumyzyň Bilim ministrliginiň we Daşary işler ministrliginiň ýolbaşçylary, ýokary okuw mekdepleriniň talyplary, şeýle hem Gazagystan, Gyrgyzystan, Täjigistan we Özbegistan döwletleriniň wekiliýetleriniň, BMG-niň degişli edaralarynyň, halkara hyzmatdaşlaryň we ýaşlar guramalarynyň wekilleriniň gatnaşmagyna garaşylýar.
Duşuşygyň çäklerinde 2025-nji ýylyň awgust aýynda Türkmenistanyň “Awaza” milli syýahatçylyk zolagynda geçiriljek BMG-niň deňze çykalgasy bolmadyk ösüp barýan ýurtlara (LLDC3) bagyşlanan Üçünji maslahatyň çäklerinde meýilleşdirilýän nobatdaky ýaşlar forumyna taýýarlyk meseleleri hem ara alnyp maslahatlaşylar.
BMG-niň ştab-kwartirasynda geçirilýän bu forum hem Türkmenistanyň döredijilikli halkara başlangyçlarynyň iş ýüzünde üstünlikli durmuşa geçirilýändiginiň nobatdaky beýanydyr.
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň IV ýyl talyby.