“Meniň halypa mugallymym” atly maslahat geçirildi
2024-nji ýylyň 4-nji oktýabrynda Türkmenistanyň Daşary işler ministrliginiň Halkara gatnaşyklary institutynda “Parahatçylyk medeniýeti” atly ÝUNESKO klubynyň açylmagynyň 2 ýyllygy we Halkara mugallymlar güni mynasybetli “Meniň halypa mugallymym” atly dabaraly maslahat geçirildi. Bu maslahata ÝUNESKO-nyň işleri barada Türkmenistanyň milli toparynyň sekretariaty, Türkmenistanyň ýokary okuw mekdepleriniň binýadynda döredilen ÝUNESKO kafedrasynyň we klublarynyň ýolbaşçylary, institutymyzyň halypa-mugallymlary we talyp ýaşlary gatnaşdylar.
“Meniň halypa mugallymym” atly maslahatyň başynda Türkmenistanyň Gahrymany, Türkmenistanyň Adatdan daşary we doly ygtyýarly ilçisi, ÝUNESKO-nyň işleri barada Türkmenistanyň milli toparynyň jogapkär sekretary Çynar Rustemowanyň ömür we zähmet ýoluna bagyşlanan dokumental filmiň görkezilişi boldy.
Dabaraly maslahatyň dowamynda Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” atly ÝUNESKO klubynyň Geňeşiniň başlygy Aýna Baýmuradowa, Magtymguly adyndaky Türkmen döwlet uniwersitetiniň “Medeni miras: geçmişden geljege” atly ÝUNESKO kafedrasynyň müdiri Bike Diwangulyýewa, Myrat Garryýew adyndaky Türkmenistanyň Döwlet lukmançylyk uniwersitetiniň “Dermanlyk ösümliklerimiz — saglygymyz, mirasymyz” atly ÝUNESKO klubynyň başlygy Merjen Berdiýewa, Döwletmämmet Azady adyndaky Türkmen milli dünýä dilleri institutynyň “Parahatçylyk dilleri” atly ÝUNESKO klubynyň başlygy Ogulsabyr Berdiýewa, Arkadag şäherinde ýerleşýän Aba Annaýew adyndaky Halkara atçylyk akademiýasynyň “Ahalteke atlary — parahatçylygyň ilçileri” atly ÝUNESKO klubynyň başlygy Gunça Şamyradowa dagy çykyş etdi. Maslahatda Türkmenistanyň Daşary işler ministrliginiň Halkara gatnaşyklary institutynyň döredijilik toparynyň höwesjeň talyplarynyň uly şatlyk-şowhun bilen ýerine ýetiren aýdym-sazlary maslahata gatnaşyjylarda ýakymly täsirleri galdyrdy.
Sähra ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.