Media we sanly sowatlylygy boýunça okuw maslahat
2025-nji ýylyň 18 — 20-nji noýabrynda Magtymguly adyndaky Türkmen döwlet uniwersitetinde Ýewropada Howpsuzlyk we Hyzmatdaşlyk Guramasynyň Aşgabatdaky merkeziniň guramagynda žurnalistika hünärinde bilim alýan talyplar üçin media we sanly sowatlylygy boýunça okuw maslahaty geçirildi. Oňa Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň mugallymlary hem-de talyplary gatnaşdylar.
Gazagystanly halkara bilermen Adil Jalilowyň onlaýn gatnaşmagynda geçirilen üç günlük okuw maslahatynyň dowamynda TDIM-iň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň uly mugallymy O.Eýeberdiýewa, Magtymguly adyndaky TDU-nyň Žurnalistika kafedrasynyň mugallymy M.Gaýypowa, «Türkmenportalyň» žurnalisti D.Konarow, Magtymguly adyndaky TDU-nyň Türkmen dili we edebiýaty fakultetiniň talyby B.Artykow dagy çykyş etdiler.
Çykyş edenleriň bellemeklerine görä, habar beriş serişdeleriniň sanlylaşdyrylmagy diňe bir täze tehnologiýalara, innowasion enjamlara geçmekligi däl-de, işi beýan etmegiň täze serişdelerini, žurnalistleriň hem-de media ulgamynyň wekilleriniň täzeçe pikirlenmegini, şeýle hem täze iş gurallaryny talap edýär. Şu nukdaýnazardan, çykyşlarda maglumatlary seljermek we barlamak, sosial torlarda emeli aňy ulanmagyň aýratynlyklary we mümkinçilikleri dogrusynda giňişleýin gürrüňler edildi. Şeýle-de sanly žurnalistikanyň gurallary, täze formatlary, sanly gurşawda žurnalistiň işini guramagyň aýratynlyklary, sanly redaksiýadaky täze wezipeler, auditoriýa bilen aragatnaşygy guramak boýunça pikir alyşmalar geçirildi.
Yslam GURBANMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.