Media sowatlylyk boýunça professor-mugallymlar üçin okuw maslahaty
2026-njy ýylyň 26-27-nji oktýabrynda Türkmenistanyň Daşary işler ministrliginiň Halkara gatnaşyklary institutynda Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky merkeziniň guramagynda mugallymlar üçin iki günlük okuw maslahaty geçirildi. Bu maslahat sanly tehnologiýalaryň eýýamynda maglumat we media sowatlylygyny ýokarlandyrmaga, kämil usullary öwretmäge, özara pikir alyşmaga gönükdirilendir. Okuw maslahatyna ýurdumyzyň ýokary okuw mekdeplerinden professor-mugallymlar gatnaşdylar.
Çäräniň açylyş dabarasynda ÝHHG-niň Aşgabatdaky merkeziniň wekili çykyş edip, häzirki zaman bilim ulgamynda media we maglumat sowatlylygyny okatmagyň usulyýeti, şeýle hem sanly meýdançada habarlary dogry seljermegiň möhüm orny barada belledi.
Okuw maslahatynda «Žurnalistleri okatmak babatda halkara standartlary öňe sürmäge ýardam bermek» taslamasynyň çäklerinde media we maglumat sowatlylygyny okatmagyň usulyýeti boýunça ýerli we halkara derejeli bilermenler Mähri Gaýypowa, Oguloraz Eýeberdiýewa, Hanum Rahmanowa, Gazagystan Respublikasyndan sanly ulgam arkaly Adil Jalilow dagylar çykyş etdiler. Olar öz çykyşlarynda maglumat we media sowatlylygy okatmagyň häzirki zaman usullary barada nazary bilimler bilen bir hatarda amaly ýumuşlara hem giň orun berdiler.
Şeýle okuw-usuly maslahatlaryň yzygiderli geçirilip durulmagy žurnalistika ugrundan bilim berýän professor-mugallymlaryň bu ugurda tejribeleriniň artmagyna giň mümkinçilik berýär.
Ogulbike YMAMBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň mugallym-öwrenijisi