MATEMATIKI MODELIRLEMEK DERSINDEN GEÇIRILEN BÄSLEŞIK
2024-nji ýylyň 12-nji fewralynda Türkmenistanyň Daşary işler ministrliginiň Halkara gatnaşyklary institutynda ýurdumyzyň ýokary okuw mekdepleriniň talyplarynyň arasynda «Matematiki modelirlemek» dersinden ders bäsleşigi geçirildi. Bäsleşik Berkarar döwletiň täze eýýamynyň Galkynyşy döwründe Türkmenistanyň Prezidenti tarapyndan tassyklanan «Türkmenistanda sanly bilim ulgamyny ösdürmegiň Konsepsiýasyndan we ony durmuşa geçirmegiň Meýilnamasyndan», «Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasyndan», «Türkmenistanda sanly ykdysadyýeti ösdürmegiň 2021–2025-nji ýyllar üçin Döwlet maksatnamasyndan», «Türkmenistanda ylym ulgamyny 2020–2025-nji ýyllarda sanly ulgama geçirmegiň Maksatnamasyndan» we «Türkmenistanda tebigy we takyk ylymlary ösdürmegiň Döwlet maksatnamasyndan» ugur alyp, ýaşlaryň ukyp-başarnyklaryny, zehinlerini ýüze çykarmak maksady bilen geçirildi.
Düzgünnama laýyklykda, bäsleşik iki tapgyrdan ybarat bolup, birinji tapgyrda gatnaşyjylara 50 sany sorag bolan test soragnamalary berildi. Bäsleşigiň ikinji tapgyrynda gatnaşyjylar 6 (alty) sany ykdysady-matematiki meseläni 4 (dört) sagadyň dowamynda özbaşdak işlediler.
Şeýle-de bäsleşige gatnaşan talyplaryň ýolbaşçy mugallymlaryny institutymyzyň çäklerinde hereket edýän kitaphanalara, okuw studiýasyna, redaksiýasyna gezelençler guraldy.
Bu geçirilen bäsleşigiň netijeleri boýunça I orunlara Türkmenistanyň Daşary işler ministrliginiň Halkara gatnaşyklary institutynyň, Türkmenistanyň Goranmak ministrliginiň Beýik Saparmyrat Türkmenbaşy adyndaky harby institutynyň, Türkmenistanyň inžener-tehniki we ulag kommunikasiýalary institutynyň, Türkmen oba hojalyk institutynyň, Türkmenistanyň Telekommunikasiýalar we Informatika institutynyň talyplary, II orunlara Türkmenistanyň Daşary işler ministrliginiň Halkara gatnaşyklary institutynyň, Türkmenistanyň Goranmak ministrliginiň Beýik Saparmyrat Türkmenbaşy adyndaky harby institutynyň, Türkmenistanyň Telekommunikasiýalar we Informatika institutynyň, Türkmenistanyň Döwlet energetika institutynyň, Türkmen döwlet binagärlik-gurluşyk institutynyň, Magtymguly adyndaky Türkmen döwlet uniwersitetiniň, Türkmen oba hojalyk institutynyň, Türkmen Döwlet Maliýe institutynyň talyplary, III orunlara Magtymguly adyndaky Türkmen döwlet uniwersitetiniň, Türkmenistanyň inžener-tehniki we ulag kommunikasiýalary institutynyň, Türkmen oba hojalyk institutynyň, Türkmen Döwlet Maliýe institutynyň, Türkmen döwlet ykdysadyýet we dolandyryş institutynyň, Türkmenistanyň Goranmak ministrliginiň Beýik Saparmyrat Türkmenbaşy adyndaky harby institutynyň, Türkmen döwlet binagärlik-gurluşyk institutynyň, Türkmenistanyň Döwlet energetika institutynyň, Türkmenistanyň serhet institutynyň, Türkmen döwlet bedenterbiýe we sport institutynyň, Ýagşygeldi Kakaýew adyndaky Halkara nebit we gaz uniwersitetiniň talyplary mynasyp bolup, bäsleşigiň ýeňijileri diýlip yglan edildiler.
Ýokary derejede guralan bäsleşigiň ahyrynda oňa baha berýän eminler topary talyplaryň geljekde kämil hünärmenler bolup ýetişmeklerinde, öz ugurlary bilen bagly ykdysady-matematiki usullar we modeller bilen iş salyşmaklarynda, olaryň halkara ýagdaýlaryny seljermekde, çaklamakda we daşary-syýasy işleri meýilleşdirmekde bu bäsleşigiň geçirilmeginiň uly ähmiýetiniň barlygyny buýsanç bilen bellediler. Ýaşlara şeýle mümkinçilikleri döredip beren Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Aýgül MÄMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
III ýyl talyby.