MAŞGALA GYMMATLYGY
2021-nji ýylyň 8-nji iýulynda Magtymguly adyndaky Türkmen döwlet uniwersitetiniň Pedagogika we psihologiýa kafedrasynyň halypa mugallymlarynyň alyp barmagynda wideoaragatnaşyk arkaly onlaýn umumy sapagy geçirildi. Sapaga ýurdumyzyň ýokary okuw mekdepleriniň birnäçesinden ýaş mugallymlar gatnaşdylar. Okuw sapagynyň ilkinji sagadynda Magtymguly adyndaky Türkmen döwlet uniwersitetiniň halypa mugallymy, professor Atajan Burinow çykyş edip, beden we ruhy taýdan sagdyn nesli ýetişdirmekde maşgala gatnaşyklarynyň tutýan ornuny nygtady. Halypa mugallym sagdyn jemgyýeti kemala getirmek üçin psihologiýa we filosofiýa ylymlarynyň döwrebap gazananlary bilen milli aňyýetiň sinteziniň ähmiýetini belläp geçdi.
Talyp ýaşlara maşgala gymmatlyklaryny düşündirmek we nesil terbiýesinde ulanylmaly usullar okuw sapagynyň özenini düzdi. Halypa mugallym Magtymguly Pyragynyň goşgularynyň çaga, maşgala terbiýesine degişli dürdäne setirleriniň şu günki güne gymmatlygyny ýitirmän gelendigini, ýaşlaryň hut hormatly Prezidentimiziň göreldesinden ugur almalydygyny aýratyn belledi. Gahryman Arkadagymyzyň millilige ýugrulan, terbiýeçilik ähmiýetli kitaplarynyň, ylaýta-da “Döwlet guşy” romanynyň üsti bilen zähmet terbiýesi berilmeginiň ähmiýeti barada aýdyp, talyplaryň watançylyk ruhunda terbiýelenmeklerini gazanmaklygy maslahat berdi.
Tirkişmyrat DURDYÝEW,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we
amalyýeti
kafedrasynyň mugallymy