«MAHABAT ÜSTÜNLIGIŇ AÇARY» ATLY FESTIWAL GEÇIRILDI
2023-nji ýylyň 31-nji maýynda Tehnologiýalar merkezinde Türkmenistanyň Bilim ministrliginiň, Türkmenistanyň Senagatçylar we telekeçiler birleşmesiniň, Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikde guramagynda Ýaş telekeçileriň we ýaşlar kärhanalarynyň arasynda «Mahabat üstünligiň açary» atly festiwalyň hem onuň çäklerinde şeýle at bilen geçirilen bäsleşigiň ýeňijilerini yglan etmek dabarasy geçirildi.
Festiwal ýaşlary mahabat işine çekmekde olaryň döredijilik ukyplaryny, başarnyklaryny, özboluşly çözgütlerini ýüze çykarmak, iň oňat mahabat önümini we mahabat nusgalaryny döretmek maksady bilen geçirildi. Bu bolsa, dörediji türkmen ýaşlarynyň uly gyzyklanmasyna eýe boldy.
«Mahabat üstünligiň açary» atly festiwalyň çäklerinde geçirilen bäsleşige 150 dalaşgär öz işleri bilen gatnaşyp, deslapky saýlawyň netijesinde olaryň arasyndan 36 mahabat işi aýratyn tapawutlanmagy başardy. Bäsleşigiň netijesi boýunça Baş baýragyň eýesi, 1 sany bäsleşigiň ýeňijisi we dürli nominasiýalarda 12 ýeňiji yglan edildi. Şolaryň arasynda institutymyzyň Halkara žurnalistikasy fakultetiniň 3-nji ýyl talyplary Aýlar Atajykowa we Gunça Hamedowa «Radioýaýlymda mahabat», Kyýat Ilamanow «Adaty däl mahabat» nominasiýalary boýunça ýeňiji diýlip yglan edildi. Şol fakultetiň 3-nji ýyl talyplary Bakydurdy Garaýewiň we Gytja Atdaýewanyň, 2-nji ýyl talyby Bägül Kakalyýewanyň, 1-nji ýyl talyby Berdigylyç Ýazmyradowyň hem-de Halkara hukugy fakultetiniň 1-nji ýyl talyby Kadyrmyrat Öwezgylyjowyň mahabat işleri aýratyn tapawutlanyp, höweslendiriji baýraklara eýe boldy. Ýeňijilere bäsleşigiň guramaçylar topary tarapyndan Diplom we gymmat bahaly sowgatlar gowşuryldy. Baýraklaryňyzyň höwri köp bolsun talyp deň-duşlar!
Bägül MERDANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň III ýyl talyby.