Magtymguly Pyragynyň parahatçylyk taglymaty we Bitarap Türkmenistanyň diplomatiýasy
2024-nji ýylyň 11-nji oktýabrynda Aşgabatda dünýäniň dürli ýurtlaryndan döwlet we hökümet Baştutanlarynyň hem-de wekiliýetleriň gatnaşmaklarynda «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forum üstünlikli geçirildi. Beýik türkmen şahyry, Gündogaryň akyldary Magtymguly Pyragynyň doglan gününiň 300 ýyllygyna bagyşlanan ýokary derejeli halkara forumyň ikinji bölümi «Magtymguly Pyragynyň parahatçylyk taglymaty we Bitarap Türkmenistanyň diplomatiýasy» diýlip atlandyrylyp, ol Türkmenistanyň Daşary işler ministrliginiň Halkara gatnaşyklary institutynda guraldy.
Mälim bolşy ýaly, beýik şahyr Magtymguly Pyragynyň döredijilik mirasy bahasyna ýetip bolmajak milli baýlyk hökmünde dünýä medeniýetiniň hazynasynyň aýrylmaz bölegidir. Onuň şygyrlary adamlaryň kalbynyň töründen orun alýar, çünki bu eserlerde bütin adamzadyň üýtgewsiz gymmatlyklary — Watana söýgi, ynsanperwerlik, parahatçylyk, döredijilige, dost-doganlyga çagyryş çuňňur beýan edilýär. Bu ýörelgeler Türkmenistanyň Bitaraplygynyň mazmunyny emele getirip, ýurdumyzyň diplomatiýasynyň özenini düzýär. Şunuň bilen baglylykda, şu gezekki halkara forumyň ikinji bölüminiň türkmen diplomatiýasynyň milli mekdebinde geçirilmeginiň uly ähmiýeti bar.
Forumyň diňe bir döwletleriň däl, eýsem, abraýly halkara guramalaryň hem ünsüni çekendigini bellemek gerek. Şoňa görä-de, halkara guramalaryň we integrasiýalaryň ýolbaşçylarydyr wekilleri foruma gatnaşmaga isleg bildirdiler.
Degişli bölümde Hytaý Halk Respublikasynyň Medeniýet we syýahatçylyk ministriniň, Türki Döwletleriň Guramasynyň, Garaşsyz Döwletleriň Arkalaşygynyň, Ykdysady Hyzmatdaşlyk Guramasynyň, TÜRKSOÝ-yň Baş sekretarlarynyň, şeýle hem Yslam Hyzmatdaşlyk Guramasynyň Baş sekretarynyň orunbasarynyň we Şanhaý Hyzmatdaşlyk Guramasynyň Baş sekretarynyň orunbasarynyň çykyşlarynda beýik şahyrymyzyň umumadamzat mirasy barada giňişleýin durlup geçildi.
Daşary ýurtly wekilleriň çykyşlarynda bellenilişi ýaly, Magtymguly Pyragynyň şahyrana mirasy ägirt uly medeni we ruhy-ahlak gymmatlyklary hökmünde adamlaryň ruhy dünýäsinde, hakydasynda giň orun aldy. Onuň köptaraply döredijiligi diňe bir türkmen halkynyň däl, eýsem, tutuş Gündogar halklarynyň medeni-ruhy ösüşine hem uly goşant goşup, dünýä edebiýatynyň genji-hazynasynyň aýrylmaz bölegine öwrüldi.
Şeýlelikde, ajaýyp söz ussadynyň doglan gününiň 300 ýyllygynyň halkara derejede baýram edilýän ýylynda «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumyň geçirilmegi akyldar şahyryň eserleriniň häzirki döwürde dünýä halklaryny şygryýetiň ruhy bilen baglanyşdyrýan birleşdiriji güýje eýedigini subut edýär. Bu halkara forum beýik türkmen nusgawy şahyrynyň baý edebi mirasynyň mundan beýläk-de wagyz edilmegine, degişli ylmy gözlegleri çuňlaşdyrmaga we giňeltmäge, onuň şahyrana döredijiligine halkara ylmy-edebi jemgyýetçiligiň ünsüni çekmäge gönükdirilen tagallalaryň nobatdaky aýdyň beýanydyr.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.