Magtymguly Pyragynyň doglan gününiň 300 ýyllygyna bagyşlanan halkara ylmy maslahat
2023-nji ýylyň 26-njy iýunynda Magtymguly adyndaky Türkmen döwlet uniwersitetinde «Berkarar döwletiň täze eýýamynyň Galkynyşy döwri we Magtymguly Pyragy» atly halkara ylmy maslahat geçirildi. Oňa ýurdumyzyň ýokary okuw mekdepleriniň professor-mugallymlary, Türkmenistanyň Ylymlar akademiýasynyň ylmy-barlag institutlarynyň alymlary, ylmy işgärleri, ministrlikleriň we pudaklaýyn dolandyryş edaralarynyň işgärleri, şeýle-de talyp ýaşlar gatnaşdylar.
Halkara ylmy maslahat öz işini umumy mejlisde we «Pyragy hem Arkadag — köňüllere şamçyrag», «Magtymguly we onuň zamanasy», «Magtymguly we Gündogar edebiýaty», «Magtymgulynyň şygryýet älemi», «Magtymgulynyň döredijiliginde ynsanperwerlik» ýaly bölümleriň 5-sinde alyp baryp, olarda akyldaryň şahyryň ömri we döredijiligi bilen bagly 100-e golaý ylmy çykyşlar diňlenildi. Halkara maslahatyň ylmy nutuklarynyň gysgaça beýanlary kitapça görnüşinde çap edilip, okyjylar köpçüligine ýetirildi.
Halkara ylmy maslahata Türkmenistanyň Daşary işler ministrliginiň Halkara gatnaşyklary institutynyň professor-mugallymlary hem-de talyp ýaşlary «Magtymgulynyň döredijiliginde ynsanperwerlik» atly 5-nji bölümçeden sanly ulgam arkaly gatnaşdylar. Şeýle-de halkara maslahata Gyrgyzystandan, Hytaýdan, Azerbaýjandan, Özbegistandan gelen daşary ýurtly alymlar bilen birlikde Türkmenistandan gatnaşýan alymlar hem bölümiň işine işjeň gatnaşdylar we ylmy esasly çykyş etdiler.
Maslahatda çykyş edenler akyldar şahyryň döredijiligini öwrenmekde daşary ýurtly we türkmen alymlarynyň hyzmaty, dana Pyragynyň şygyrlaryny dünýä dillerine terjime etmekde ýerine ýetirilen işler dogrusynda giňişleýin gürrüňler edildi. Şeýle-de Magtymguly Pyragynyň döredijilik mirasynda milli ruhy ahlak gymmatlyklaryň beýany we onuň watansöýüjiligiň, ynsanperwerligiň, parahatçylyk, hoşniýetlik ýol-ýörelgeleriniň esasy bolup durýandygy barada bellenip geçildi.
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy fakultetiniň I ýyl talyby.