«MAGTYMGULY DIÝIP ADYM TUTSALAR...» ATLY HALKARA ONLAÝN WIKTORINA
2024-nji ýylyň 15-nji maýynda Türkmenistanyň Daşary işler, Bilim we Medeniýet ministrlikleriniň, Telewideniýe, radiogepleşikler we kinematografiýa baradaky döwlet komitetiniň hem-de Magtymguly adyndaky Ýaşlar guramasynyň Merkezi geňeşiniň bilelikde guramagynda ýurdumyzyň hem-de daşary ýurtlaryň ýokary okuw mekdeplerinde bilim alýan talyplaryň arasynda «Magtymguly diýip adym tutsalar...» atly halkara onlaýn wiktorina geçirildi.
Gündogaryň beýik söz ussady, akyldar şahyr Magtymguly Pyragynyň edebi mirasyny ebedileşdirmek, türkmen hem-de dünýä ýurtlarynyň ýaşlarynyň arasynda giňden dabaralandyrmak maksady bilen geçirilen halkara onlaýn wiktorina Türkmenistanyň Daşary işler ministrliginiň Halkara gatnaşyklary institutynyň talyplary hem işjeň gatnaşdylar. Talyplar akyldar şahyryň döredijiliginiň özboluşly şahyrana we baý edebi mirasynyň gadyr-gymmaty hem-de daşary ýurtly tanymal ýazyjy-şahyrlaryň Magtymguly Pyragy barada aýdanlary, şeýle hem beýik akyldaryň öňe süren umumadamzat ähmiýetli ynsanperwer ýörelgeleri barada ýazan goşgulary, terbiýeçilik ähmiýetli öwüt-nesihatlary bilen baglanyşykly 3 dilde (türkmen, rus we iňlis) taýýarlanan test sowallaryna jogap berdiler.
Bäsleşigiň netijeleri Magtymguly Pyragynyň 300 ýyllyk ýubileý toýunyň çäklerinde geçiriljek dabaraly çärelerde guramaçylyk topary tarapyndan yglan ediler hem-de Hormat hatlary we gymmatbahaly sowgatlar bilen sylaglanylar.
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.