«LET'S SING A SONG» ATLY IŇLIS DILINDE GEÇIRILEN AÝDYM-SAZLY BÄSLEŞIK
2024-nji ýylyň 24-nji aprelinde Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň guramagynda Iňlis dili hepdeliginiň çäklerinde institutyň ähli fakultetleriniň 1-nji ýyl talyplarynyň arasynda «Let's sing a song» atly aýdym-sazly bäsleşik gurnaldy. Bäsleşik iňlis dilinde geçirilip, onda her fakultetden bir topar çykyş etdi.
Bäsleşigiň maksady «Türkmenistanda daşary ýurt dillerini okatmagy kämilleşdirmek Konsepsiýasyndan» ugur alyp, döwletimizde ýaş nesilleriň şadyýan, sagdyn ösmegini, döwrebap bilim-terbiýe almagyny, hünär öwrenmegini, dil başarnyklaryny ösdürmegi gazanmakdan ybarat.
Bäsleşik üç şertden ybarat bolup, onuň 1-nji şerti boýunça toparlar özlerini aýdymyň üsti bilen tanyşdyrdylar, 2-nji şertinde toparlar iki dilde türkmen we iňlis dillerinde aýdym aýtdylar we 3-nji şertinde «Aýdymy bil (Guess the song)» diýlip atlandyrylyp, ýagny berlen aýdymlaryň, aýdymçynyň adyny bilmekden ybarat.
Netijede, Halkara ykdysady gatnaşyklary hünäriniň 1-nji ýyl talyby M.Guzyçyýewa, Halkara žurnalistikasy hünäriniň 1-nji ýyl talyby S.Abaýewa we şol hünäriň 2-nji ýyl talyby B.Begnazarow dagylar tapawutlanyp, ähli toparlar deň netije görkezdiler.
Bäsleşige gatnaşyjylar bagtyýar durmuşda ýaşadýan, ýaşlara okamaga, öwrenmäge, döretmäge ähli şertleri döredýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Dawut GEZEROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.