“PARAHATÇYLYK MEDENIÝETI – ÝAŞLARYŇ GÖZI BILEN” ATLY SURAT ÇEKMEK BÄSLEŞIGI
2024-nji ýylyň 17-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatik işgärleriniň güni mynasybetli ýurdumyzyň orta mekdepleriniň 1–11-nji synp okuwçylarynyň arasynda «Parahatçylyk medeniýet–ýaşlaryň gözi bilen» atly surat çekmek bäsleşigine hödürlenen suratlaryň sergisi geçirildi. Döredijilik bäsleşiginiň esasy maksady ösüp gelýän ýaş nesliň dünýäde parahatçylyk we howpsuzlyk baradaky düşünjeliligini we medeniýetini artdyrmaga gönükdirilendir. Serginiň açylyş dabarasyna BMG-niň Çagalar gaznasynyň (ÝUNISEF) Türkmenistandaky wekilhanasynyň ýolbaşçysy M.Faýýazi, institutymyzyň professor-mugallymlary we eminler toparynyň agzalary gatnaşdylar.
Hormatly Prezidentimiziň baştutanlygynda Watanymyz parahatçylyk söýüjilik, ylalaşyklylyk, hoşniýetlilik we ynsanperwerlik ýörelgelerini jemgyýetde, gündelik durmuşda ilerletmek bilen, bu düşünjeleri daşary syýasat strategiýasynda işjeň ulanylýar. Surat sungaty ýaşlaryň ukyp-başarnygyny, döredijiligini açyp görkezmegiň usuly bolup durýar. Ýurdumyzyň dürli künjeklerinden mekdep okuwçylary bu bäsleşige aýratyn gyzyklanma bildirdiler we ýurdumyzyň daşary syýasatyny wasp edýän 500-den gowrak suratlar hödürlendi.
Bäsleşigiň jemini jemlemek üçin döredilen eminler toparyna Türkmenistanyň Döwlet çeperçilik akademiýasynyň Grafika kafedrasynyň mugallymy A.Tuwakow, Türkmen döwlet medeniýet institutynyň mugallymy taryh ylymlarynyň kandidaty, Türkmenistanyň Halk suratkeşi, Ö.Mämmetnurow hem-de institutymyzyň Halkara gatnaşyklary we diplomatiýa kafedrasynyň professory, sosiologiýa ylymlarynyň doktory Ö.Muhammetberdiýew, Halkara gatnaşyklary we diplomatiýa kafedrasynyň uly mugallymy N.Amanmyradow gatnaşdylar. Bäsleşigiň jemleri boýunça 2 sany I orun, 3 sany II orun, 4 sany III orun we birnäçe höweslendiriji baýraklary bermek meýilleşdirilýär. Şeýle hem bäsleşigiň düzgünnamasynyň şertlerine gabat gelýän suratlary çeken beýleki mekdep okuwçylaryna Minnetdarlyk hatlaryny bermek göz öňünde tutulýar. Bäsleşigiň jemleri 2024-nji ýylyň 19-njy fewralynda jemlener.
Gülsenem HOMMADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme
hukuk öwreniş kafedrasynyň öwreniji mugallymy.