Italiýanyň ilçisi bilen täsirli duşuşyk
2023-nji ýylyň 6-njy maýynda Italiýa Respublikasynyň Türkmenistandaky ilçisiniň Rezidensiýasynda Italiýa Respublikasynyň Türkmenistandaky Adatdan daşary we Doly ygtyýarly ilçisi Luiji Ferrari bilen italýan dili boýunça ýokary okuw mekdepleriň talyplarynyň arasynda geçirilen olimpiýadanyň ýeňijileriniň duşuşygy geçirildi. Duşuşyga ýokary okuw mekdepleriň talyplary bilen bir hatarda Türkmenistanyň Daşary işler ministrliginiň Halkara gatnaşyklary institutynyň talyp ýaşlary hem gatnaşdylar.
Duşuşygyň dowamynda ilçi, ilki bilen, Halkara ynsanperwer ylymlary we ösüş uniwersiteti tarapyndan 2022-nji ýylyň 19-njy noýabrynda italýan dili boýunça ýokary okuw mekdepleriň talyplarynyň arasynda onlaýn görnüşinde guralan olimpiýadanyň ýokary derejede geçirilmegi, ýeňiji bolan talyplaryň üstünligi bilen tüýs ýürekden gutlady. Soňra ilçi talyplar bilen sorag-jogap alyşdy. Şeýle-de talyplara italýan tagamlary hödür-kerem edildi.
Duşuşygyň ahyrynda ýeňijilere ilçi tarapyndan taýýarlanylan sowgatlar gowşurylyp, ýadygärlik surata düşüldi.
Arslankerim KERIMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady
gatnaşyklary fakultetiniň 4-nji ýyl talyby.