Institutymyzda “Sagdyn durmuş ýörelgesi – bagtly geljegiň binýady” atly sport hepdeligine badalga
2023-nji ýylyň 8-nji maýynda Türkmenistanyň Daşary işler ministrliginiň Halkara gatnaşyklary institutynda “Sagdyn durmuş ýörelgesi – bagtly geljegiň binýady” atly sport hepdeligine badalga berildi. Sport hepdeliginiň ilkinji gününde Türkmenistanyň Daşary işler ministrliginiň Halkara gatnaşyklary institutynyň hem-de Döwletmämmet Azady adyndaky Türkmen milli dünýä dilleri institutynyň talyp türgenleriniň arasynda sportuň el pökgüsi (gandbol), küşt, stol tennisi, futbol we basketbol görnüşleri boýunça dostluk duşuşyklary geçirildi. Talyp türgenler bu duşuşyklarda özleriniň ussatlygyny görkezdiler.
Duşuşyklaryň dowamynda bilelikde okuw-türgenlişik sapaklary geçirildi. Tälimçidir bedenterbiýe mugallymlary talyplara sportuň her görnüşiniň inçe tilsimlerini, taryhyny we oýnuň düzgünlerini düşündirdiler. Sport oýunlary barada gyzykly maglumatlary gürrüň berdiler. Şeýle hem, halypalar ýaşlara sportuň – sagdynlygyň we ruhubelenligiň esasydygyny nygtadylar.
Türgnelişikleriň ahyrynda talyp türgenler dünýä ülňülerine laýyk gelýän sport bilen meşgullanmak üçin döredip berýän mümkinçilikleri üçin türkmen halkynyň Milli Lideri, Gahryman Arkadagymyza, Arkadagly Serdarymyza alkyş sözlerini aýtdylar.
Döwletýar ARÇAMYRADOW,
Turkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.