Institutda geçirilen amaly sapak
2021-nji ýylyň 26-njy martynda Türkmenistanyň Daşary işler ministrliginiň Halkara gatnaşyklary institutynda amaly sapak geçirildi. Žurnalistikanyň nazaryýeti we amalyýeti kafedrasy tarapyndan guralyp, Halkara žurnalistikasy fakultetiniň 1-3-nji ýyl talyplary gatnaşan bu sapagy “Ashgabat Innovative” habarlar web saýtynyň wekili, Türkmenistanyň Senagatçylar we telekeçiler partiýasynyň Aşgabat şäher komitetiniň baş hünärmeni Merdan Ataýew alyp bardy. Amaly sapak Türkmenistanyň Prezidentiniň 2020-nji ýylyň 23-nji dekabrynda sanly wideoaragatnaşyk arkaly geçiren iş maslahatynda ýokary derejeli žurnalistleri taýýarlamaga aýratyn üns bermek, halypa-şägirt ýörelgesini dowam etmek barada beren tabşyryklarynyň durmuşa geçirilişine bagyşlandy.
Sapagyň barşynda myhman ýurdumyzda sanly ulgamy giňden ornaşdyrmakda ýüze çykýan meseleler, internet žurnalistikasynyň ösüşi, web saýt arkaly işlemegiň aýratynlyklary barada gürrüň berdi.
Söhbetdeşlik görnüşinde alnyp barlan amaly sapagyň ahyrynda Merdan Ataýew talyplaryň özlerini gyzyklandyrýan sowallaryna jogap berdi.
Sona HALYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby