«Iň gowy taýýarlykly sanitar topary» atly ýaryş
2023-nji ýylyň 30-njy noýabrynda Türkmen Döwlet bedenterbiýe we sport institutynda Türkmenistanyň Bilim ministrliginiň «Raýat goranyşyna we adatdan daşary ýagdaýlara taýýarlyk boýunça esasy çäreleriň 2023-nji ýyl üçin meýilnamasyny» ýerine ýetirmek maksady bilen, Aşgabat şäheriniň çägindäki ýokary okuw mekdeplerinde döredilen sanitar toparlarynyň arasynda “Iň gowy taýýarlykly sanitar topary” atly ýaryş geçirildi. Ýaryşa Türkmenistanyň Daşary işler ministrliginiň Halkara gatnaşyklary institutynyň, Türkmen döwlet medeniýet institutynyň, Türkmenistanyň Telekommunikasiýalar we informatika institutynyň, Türkmenistanyň Oguz han adyndaky Inžener-tehnologiýalar uniwersitetiniň, Türkmen döwlet binagärlik-gurluşyk institutynyň, Maýa Kulyýewa adyndaky Türkmen milli konserwatoriýasynyň, Türkmen döwlet bedenterbiýe we sport institutynyň, Türkmenistanyň Döwlet çeperçilik akademiýasynyň talyplaryndan döredilen sanitar toparlar gatnaşdylar.
Ýaryş 4 şertden ybarat bolup, onuň 1-nji şertinde ýaryşa gatnaşyjylar sanitar toparlaryň üpjünçiligini barlamak, ejir çekeni alyp gitmekde enjamlaryň üpjünçiligi barada gürrüň berdiler. Ýaryşyň 2-nji şerti şikes alanlara ilkinji lukmançylyk kömegini bermek boýunça sorag-jogap görnüşinde çekeleşikli dowam etdi. Onuň 3-nji şerti şikes alanlara ilkinji lukmançylyk kömegini bermek boýunça geçirildi. Onda talyplar gaza garşy şahsy gorag serişdelerini we derini goraýan gorag eşigini kada laýyklykda bellenen wagtda geýmekde öz erjelliklerini, çalasynlyklaryny görkezdiler.
Ýaryşyň netijeleri boýunça 140 bal bilen Türkmenistanyň Daşary işler ministrliginiň Halkara gatnaşyklary instituty I orna mynasyp bolup, ýeňiş gazandy.
Näzbibi GOŇUROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.